रसिब गलाकमा अनुबन्धित

काठमाडौं (हाम्रो खेलकुद) – गलाक द लाइफ स्टायलले मुवाँथाइ खेलाडी रसिब जारीलाई १ वर्षका लागि शुक्रबार अनुबन्ध गरेको छ ।गलाकका प्रमुख कार्यकारी अधिकृत अज्नब लिबीले रसिबलाई खेल पोशाक प्रदान गरी रसिबलाई अनुबन्ध गरेको औपचारिक घोषणा गरे ।

नेपाल राष्ट्रिय मुवाँथाइ संघका अध्यक्ष गणेशलाल कक्षपतिको उपस्थितिमा रसिबलाई अनुबन्ध गरेको घोषणा गरिएको हो । गलाकले प्रति महिना १० हजार रुपैयाँ प्रदान गर्ने गरी १ वर्षका लागि रसिबलाई अनुबन्ध गरेको जनाएको छ । रसिब लाइट हेभी वेटतर्फ ४ पटकका च्याम्पियन हुन् ।

कार्यक्रममा अध्यक्ष कक्षपतिले मुवाँथाइमा पनि पहिलो पटक खेलाडी अनुबन्धको थालनी भएकोमा खुशी व्यक्त गर्दै गलाकलाई धन्यवाद दिए । अध्यक्ष कक्षपतिले भने– ‘ढीलै भएपनि मुवाँथाइमा पनि खेलाडी अनुबन्धको सुरुआत भएको छ । अरु खेलमा खेलाडी कुनै क्लब वा टिमसंग अुनबन्ध हुन्थे । तर पहिलो पटक मुवाँथाइमा पनि खेलाडी अनुबन्ध गर्ने परम्पारको थालनी भएकोमा खुशी छु ।

यसले मुवाँथाईलाई थप व्यवसायिकरण गर्ने विश्वास छ । गलाकलाई धन्यवाद’ प्रमुख कार्यकारी अधिकृत लिबीले आगामी दिनमा अन्य खेलाडीलाई पनि अनुबन्ध गर्ने योजना रहेको जानकारी गराए ।