काठमाडौं (हाम्रो खेलकुद) – नेपाल नम्वर एक प्रो भुवन नगरकोटी सूर्य नेपाल गल्फ टुर २०२१–२२ अन्तर्गतको चौथो स्पर्धा सूर्य नेपाल एनपिजिएको क्वाटरफाइनलमा प्रवेश गरेका छन् ।

रोयल नेपाल गल्फ क्लबमा मंगलबार भएको पहिलो राउन्डमा १८औं वरीयताका सचिन भट्टराईलाई ६/४ ले पछि पार्दै अन्तिम आठमा प्रवेश गरेका हुन् । उनी चार होल बाँकी रहँदै ६ अप रहँदै मंगलबार भएको खेलहरूमा सबैभन्दा भारी स्कोरले विजयी बन्ने खेलाडी बने । अब भुवनले नवौं वरीयताका दिनेश प्रजापतिसँग खेल्न बाँकी छ । दिनेशले १०औं वरीयताका सुर्य प्रसाद शर्मालाई ३/२ ले हराए ।

सुर्य नेपाल गल्फ टुरको वर्षको चौथो प्रतियोगितामा २०१८–१९ को सिजनको शीर्ष १६ खेलाडीले सहभागिता जनाउने प्रावधान रहेपनि दोस्रो वरीयताका शिवराम श्रेष्ठ र १४औं वरीयताका दीपक आचार्य सहभागिता नजनाउने भएपछि १७औं वरीयताका शिव कुमार माझी १८औं वरीयतामा रहेका सचिन भट्टराईले अवसर पाएका थिए ।

तेस्रो वरीयताका विकास अधिकारी, चौथो वरीयताका सञ्जय लामा, पाँचौका धन बहादुर थापा, छैटौंका रामे मगर, सातौका जयराम श्रेष्ठ र १०औं वरीयताका दीपक मगर पनि क्वाटरफाइनलमा प्रवेश गरेका छन् । विकासले शिव कुमार माझीलाई र सन्जयले रामकृष्ण श्रेष्ठलाई समान ५/४ अंकले हराए । धनबहाहुरले बलभद्र राईलाई र रामेल भुवन कुमार रोक्कालाई अन्तिम होलमा पराजित गरे ।

सिजनको पहिलो प्रतियोगिता सुर्य नेपाल काठमाडौं ओपनको विजेता जयरामले कृष्णमान राजवहाकलाई ५/४ ले तथा रेगुलेसन समयको १८ होलमै बराबरीको अवस्थामा रहेको खेलमा दिपक मगरले वरियताको आठौँ स्थानका रवि खड्का सेकेन्ड एक्स्ट्रा होलमा पराजित गरे ।

बुधबार क्वाटरफाइनल र सेमिफाइनल हुनेछन् । तेस्रो स्थान र फाइनल बिहीबार हुनेछ । सेमिफाइनलसम्मका खेलहरु १८ होलमा तथा फाएनल ३६ होलमा खेलाइनेछ । नेपाल प्रोफेसनल गल्फ एसोसियसनको आयोजना तथा सूर्य नेपाल प्रालि प्रायोजक रहेको प्रतियोगिताको विजेताले ५० हजार रुपैया प्राप्त गर्नेछन् ।

दोस्रो हुनेले ३० हजार, तेस्रोले २२ हजार तथा चौथो हुनेले १८ हजार रुपैयाँ हात पार्नेछन् । क्वाटरफाइनलमा पराजित हुने चार खेलाडीले समान १० हजार तथा पहिलो चरणबाट बाहिरिएकाले समान ५ हजार प्राप्त गर्नेछन् ।