दमक (हाम्रो खेलकुद) – विभागीय नेपाल पुलिस क्लबले प्रथम दमक कप राष्ट्रिय महिला भलिबल प्रतियोगितामा तेस्रो स्थान हासिल गरेको छ । पुलिसले अर्काे विभागीय टोली नेपाल एपीएफ क्लबलाई ३–१ को सेटमा पराजित गर्दै तेस्रो स्थान हासिल गरेको हो ।

झापा दमकको पसुहाटमा मंगलबार तेस्रो स्थानको लागि भएको खेलको पहिलो सेट पुलिसले २५–२३ ले आफ्नो पक्षमा पारेको थियो । दोस्रो सेट पुलिसले २२–२५ ले गुमाएको थियो । त्यसपछिको दुवै सेट पुलिसले आफ्नो पक्षमा पार्दै तेस्रो स्थान हासिल गर्न सफल भएको हो ।

योसँगै पुलिसले एपीएफलाई यो प्रतियोगितमा दुई खेलमा हराउन सफल भएको छ । पुलिसले समूह चरणमा ३–० को सोझो सेटमा जित निकालेको थियो । आफ्नो मुख्य खेलाडी सरस्वती चौधरी चोटका कारण टोलीमा नरहँदा एपीएफको प्रदर्शन कमजोर देखिएको थियो ।

तेस्रो स्थान हासिल गरेको पुलिसले ५० हजार तथा चौथो भएको पुलिसले ३० हजार रुपैया प्राप्त गरेको छ । प्रतियोगिताको उपाधिका लागि त्रिभुवन आर्मी क्लब र होङ्गान्जी न्यु डायमन्ड स्पोर्ट्स क्लबबीच खेल भइरहेको छ ।

दमक भलिबल संघले ११२औं अन्तर्राष्ट्रिय महिला दिवसको अवसरमा आयोजना महिला राष्ट्रिय भलिबल प्रतियोगितामा ६ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । समूह ‘ए’ मा एपिएफसँगै पुलिस र प्रदेश १ तथा समूह ‘बी’ मा आर्मी, अमक भलिबल क्लब र न्यू डायमन्ड स्पोर्ट्स क्लब रहेका छन् ।

प्रतियोगिताको विजेता २ लाख रुपैयाँसँग ट्रफी हात पार्नेछ । दोस्रो हुने टोलीले १ लाख प्राप्त गर्नेछ । तेस्रो हुनेले ५० हजार तथा चौथोले ३० हजार रुपैया प्रदान गरिनेछ । विधागततर्र्फ सर्वाेत्कृष्ट खेलाडीले १० हजार रुपैया प्रदान गरिने आयोजकले जनाएको छ । यस्तै व्यक्तिगतविधातर्फ स्पाइकर, ब्लकर, सेटर, सर्भर, डिफेन्डरले समान ५ हजार प्राप्त गर्नेछन्