काठमाडौं (हाम्रो खेलकुद) – बागमती प्रदेशका ओमरकार सिंहलले प्रथम बीर गणेशमान सिंह राष्ट्रिय फेन्सिङ्ग प्रतियोगितामा पुरुष ब्यक्तिगत तर्फ दुई स्वर्णपदक जित्न सफल भएका छन् । उनले सावर र ईपीतर्फ स्वर्ण हात पारेका हुन् ।

सावरमा सिंहले बागमतीकै पायष योञ्जनलाई निकै नै प्रतिस्पर्धात्मक खेलमा १५–१४ अंकले पराजित गर्दै स्वर्ण हात पारेका हुन् । १३–१४ ले पछाडी परेको अवस्थामा खेलमा सुधार गर्दै सिंहले १५–१४ को अग्रता लिदै जित निकाल्न सफल भएको हो । एपिएफका राजेन्द्र गजुरेल र खिम खत्री तेस्रो भए ।

बीर गणेशमान सिंह स्पोर्टस् कमिटि र नेपाल फेन्सिङ संघको संयुक्त आयोजनमा भएको प्रतियोगिताको ईपीतर्फ पनि ओमकारले स्वर्ण हात पारे । उनले निकै नै प्रतिस्पर्धात्मक खेलमा सेनाका जंग गिरीलाई १०–९ अंकले पराजित गरे ।

निर्धारित समय सम्म दुवैको समान ९–९ अंक भएपछि निर्णयका लागि थप गरिएको १ मिनेटमा सिंहले १ अंक जोड्दै १०–९ अंकका साथ स्वर्ण हात पारे । सेनाका मिन कार्की र बागमतीका भिष्मराज (तार्जन) दाहालले कास्य पाए ।

यस्तै पुरुषकै फ्वाईलतर्फ सेनाका जलेन्द्र शाहीले बाजी मारे । उनले आफ्नै विभागका खेलाडी राजन खड्कालाई १५–६ अंकले पराजित गर्दै स्वर्ण जिते । एपिएफका शेर ऐर र सेनाका नरेन्द्र धामी तेश्रो भए ।

शनिबारबाट सुरु भएको प्रतियोगितामा चार क्षेत्र प्रदेश १, बागमती, सुदूरपश्चिम, गण्डकीका साथै दुई विभागिय टोली नेपाली सेनाको त्रिभुवन आर्मी क्लब र सशस्त्र प्रहरीको एपिएफ क्लब गरि ६ टोलीका ११४ खेलाडीहरुले १२ स्वर्ण पदकका लागि प्रतिस्पर्धा गरिरहेका छन् ।

प्रतियोगितामा सावर, ईपी, फ्वाईल गरि तीन बिधामा ब्यक्तिगत र टिम स्पर्धामा महिला तथा पुरुषको प्रतिस्पर्धा हुने छ ।