काठमाडौं (हाम्रो खेलकुद) – पाँचपोखरी भोताङ क्रिकेट टिमले पाँचपोखरी टि२० जिल्ला स्तरिय क्रिकेट प्रतियोगिता उपाधि जितेको छ । भोताङले फाइनलमा पाँचपोखरी क्रिकेट क्लबलाई ६८ रनले हराउँदै उपाधि जितेको हो ।

मुलपानी क्रिकेट मैदानमा टस हारेर ब्याटिङ थालेको भोताङले निर्धारित २० ओभरमा ८ विकेट गुमाउँदै १ सय २४ रन बनाएको थियो । तल्लोक्रमका पेम्बा तामाङले ३६ बलमा ३ चौका र २ छक्कासहित ५४ रन बनाए । देवा लामा ७, पासाङ तामाङ १६ रन बनाए । पाँचपोखरीका अनुभवी ब्याटर विजय धितालले ४ ओभरमा १८ रन खर्चेर ४ विकेट लिए । निशान्त धिताल, सार्थक धितालले १–१ विकेट लिए ।

१ सय २५ रनको विजयी लक्ष्य पछ्याएको पाँचपोखरी १७.३ ओभरमा ५६ रनमा अल आउट भयो । पाँचपोखरीको सुवास धिताल ११, अजय धिताल १२, सार्थक धिताल, महेश देउजा र अर्यान धिताल ६–६ रनमा आउट भए ।

पाँचपोखरीका युवा अलराउन्डर सार्थक धिताल प्रतियोगिता सर्वोत्कृष्ट खेलाडी चुनिए । पाँचपोखरीलाई फाइनल सम्म पुर्याउन १५ वर्षिय सार्थकले ९३ रन बनाउनुको साथै ११ विकेट लिएका थिए । पाँचपोखरीकै तीव्र गतिका बलर अर्यान धिताल ८ विकेटका साथ प्रतियोगिता उत्कृष्ट बलर चुनिए ।

१७ वर्षिय रिञ्जिन लामा १ सय २७ रनका साथ प्रतियोगिता उत्कृष्ट ब्याटर चुनिए । विजेता भोताङले ७५ हजार र उपविजेता पाँचपोखरीले ४० हजार प्राप्त गरे । सिन्धुपाल्चोक जिल्लाका ८ टोली प्रतियोगितामा सहभागी थिए ।