काठमाडौं (हाम्रो खेलकुद) – १३औं दक्षिण एसियादी खेलकुद (साग) मा बक्सिङ खेलमा नेपालको तर्फबाट सहभागी भई पदक जित्न सफल खेलाडी तथा अफिसियल सम्मानित भएका छन् ।

मार्शल आर्ट अर्गनाईजेन नेपालले शनिबार कीर्तिपुर ४ स्थित सिम क्षेत्रको ‘विथ लोकल्स’ नेपाल फार्म हाउसमा भएको आत्मरक्षा प्रशिक्षण कार्यक्रम दौरान खेलाडीहरुलाई सम्मानित गरेको हो । सम्मानित हुने खेलाडी तथा प्रशिक्षकमा बक्सिङ खेलमा लामो समयसम्म प्रशिक्षक भई योगदान पु¥याएका कीर्तिपुर ७ का उमेश कटुवाललाई ५० हजार र सम्मानपत्रले सम्मानित गरे ।

यस्तै, सागमा स्वर्णपदक विजेता मीना गुरूङ र भुपेन्द्र थापालाई ५ हजारसहित सम्मान–पत्र, रजत पदक बिजेता ललिता महर्जन, माला राई, संगीता सुनार, पुनम रावल, गणेश प्रशान्त, आशिष दवाडी र कास्य पदक बिजेता सुशील थापा, तेजबहादुर देवान, पूर्ण राई, विकास लामा, अर्जुन सेभु, चन्द्रकला थापा र अफिसियल टिमका नेपाल चिफ कोच प्रकाश थापा मगर, डम्बर दत्त भट्ट, प्रवीण तुलाधर, दीपक महर्जन, किशोर लिम्बू र म्यानेजर टिमका प्रेम फौजु र प्रमिला राई सम्मानित भएका थिए ।

खेलाडी तथा प्रशिक्षकलाई कीर्तिपुर नगरपालिकाका मेयर रमेश महर्जन, मार्शल आर्ट अर्गनाईजेन नेपालका अध्यक्ष तथा नेपाल उसु संघका उपाध्यक्ष राजीव महर्जन, नगरपालिकाकी उपप्रमुख सरस्वती रिजाल खड्का, नेपाल बक्सिङ संघका अध्यक्ष राम अवाले र उपाध्यक्ष अर्जुनबहादुर केसीलगायतले पुरस्कृत गरे ।

आत्मरक्षा प्रशिक्षणमा कीर्तिपुर नगरपालिकाका १० वडा र विद्यालयका गरि १ सय जना महिला तथा छात्राहरूको सहभागिता रहेको थियो ।