दमक (हाम्रो खेलकुद) – होङ्गान्जी न्यू डायमन्ड स्पोर्ट्स क्लबले दमकमा आजदेखि सुरु भएको प्रथम दमक कप राष्ट्रिय महिला भलिबल प्रतियोगितामा विभागीय त्रिभुवन आर्मी क्लबमाथि रोमाञ्चक जित निकालेको छ । डायमन्डले आर्मीमाथि ३–२ को रोमाञ्चक जित निकालेको हो ।

झापा दमकको पसुहाटमा शनिबार भएको रोमाञ्चक बनेको खेलमा डायमन्डले पहिलो १८–२५ ले गुमाएको थियो । डायमन्डले ७–११ को सुरुवाती अग्रता लिनका बाबजुत त्यसलाई जोगाउन नसक्दा पहिलो सेट गुमाउन पुगेको थियो । दोस्रो सेटमा डायमन्डले खेलको सुरुवातदेखि नै आरामदायी अग्रता बनाउँदै २५–१६ को सहज जित निकाल्न सफल भयो । सुरुवातमै ७–० को अग्रता लिएका डायमन्डले त्यसपछि १४–७ को अग्रता लिदै जित निकाल्न सफल भएको थियो ।

तेस्रो सेटमा सुरुवातमा प्रतिस्पर्धा चलेपनि लय गुमाउन पुगेको डायमन्डले १२–२५ ले गुमाउन पुग्यो । चौथो सेटमा डायमन्डले ९–७ हुँदै १२–७ को अग्रता लिदै २५–१३ ले आफ्नो पक्षमा पारेपछि खेल पाँचौ सेटमा लम्बिएको थियो ।

प्रतिस्पर्धात्मक बनेको पाँचौ सेट डायमन्डले १९–१७ को रोमाञ्चक जित निकाल्न सफल भयो । १०–९ को अवस्थामा लगातार ३ अंक बटुल्दै डायमन्ड जितनजिक पुगेपनि आर्मीले उत्कृष्ट पूनरागमन गर्दै १४–१३ को अग्रता लिन सफल भएको थियो । तर, त्यसपछि डायमन्डले लगातार २ अंक जोड्दै रोमाञ्चक जित निकाल्न भयो । जितसँगै डायमन्डले समूह ‘बी’ मा २ अंक जोडेको छ । आर्मीले १ अंक जोडेको छ ।

त्यसअघि शनिबार भएको पहिलो खेलमा नेपाल पुलिस क्लबले नेपाल एपिएफ क्लबमाथि २५–१६, २५–१८ र २५–१७ को सहज जित निकाल्दै विजयी सुरुवात गरेको छ । चोटका कारण मुख्य स्पाइकर सरस्वती चौधरीविनाको एपिएफले पुलिससामु कुनै पनि समय खुलेर खेल्नै सकेनन् ।

प्रतियोगितामा आइतबार चार खेल हुने आयोजकले जनाएको छ । दमक भलिबल संघले ११२औं अन्तर्राष्ट्रिय महिला दिवसको अवसरमा आयोजना महिला राष्ट्रिय भलिबल प्रतियोगितामा ६ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

समूह ‘ए’ मा एपिएफसँगै पुलिस र प्रदेश १ तथा समूह ‘बी’ मा आर्मी, अमक भलिबल क्लब र न्यू डायमन्ड स्पोर्ट्स क्लब रहेका छन् । हरेक समूहका शीर्ष दुई टोली सेमिफाइनलमा प्रवेश गर्नेछन् । फाइनल २४ फागुनमा हुनेछ । प्रतियोगिताको विजेता २ लाख रुपैयाँसँग ट्रफी हात पार्नेछ । दोस्रो हुने टोलीले १ लाख प्राप्त गर्नेछ । सात्वना टोलीलाई समान १५ हजार रुपैया प्रदान गरिनेछ ।

विधागततर्र्फ सर्वाेत्कृष्ट खेलाडीले १० हजार रुपैया प्रदान गरिने आयोजकले जनाएको छ । यस्तै व्यक्तिगतविधातर्फ स्पाइकर, ब्लकर, सेटर, सर्भर, डिफेन्डरले समान ५ हजार प्राप्त गर्नेछन् ।