काठमाडौं (हाम्रो खेलकुद) – चोटका कारण आफ्नो महत्वपुर्ण स्पाइकर सरस्वती चौधरीविनाको नेपाल एपिएफ क्लबले झापाको दमकमा जारी प्रथम दमक कप राष्ट्रिय महिला भलिबल प्रतियोगितामा हार बेहोरेको छ ।

एपिएफले अर्काे विभागीय टोली नेपाल पुलिस क्लबसँग ३–० को सोझो सेटमा हार बेहोरेको हो । झापा दमकको पसुहाटमा शनिबार भएको पहिलो खेलमा पुलिसले पहिलो सेट २५–१६ ले सहजै आफ्नो पक्षमा पारेको थियो । दोस्रो सेटमा २५–१८ को जित हात पारेको पुलिसले तेस्रो सेट २५–१७ ले सहजै आफ्नो पक्षमा थियो ।

चोटका कारण सरस्वती चौधरीविनै कोर्टमा उत्रिएको एपिएफले कुनै पनि समय पुलिसलाई बलियो चुनौती पेश गर्न सकेन । पुलिसविरुद्ध एपिएफ निकै फितलो प्रदर्शन गरेको थियो ।

दमक भलिबल संघले ११२औं अन्तर्राष्ट्रिय महिला दिवसको अवसरमा आयोजना महिला राष्ट्रिय भलिबल प्रतियोगितामा ६ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

समूह ‘ए’ मा एपिएफसँगै पुलिस र प्रदेश १ तथा समूह ‘बी’ मा आर्मी, अमक भलिबल क्लब र न्यू डायमन्ड स्पोर्ट्स क्लब रहेका छन् । हरेक समूहका शीर्ष दुई टोली सेमिफाइनलमा प्रवेश गर्नेछन् । फाइनल २४ फागुनमा हुनेछ ।

प्रतियोगिताको विजेता २ लाख रुपैयाँसँग ट्रफी हात पार्नेछ । दोस्रो हुने टोलीले १ लाख प्राप्त गर्नेछ । सात्वना टोलीलाई समान १५ हजार रुपैया प्रदान गरिनेछ ।

विधागततर्र्फ सर्वाेत्कृष्ट खेलाडीले १० हजार रुपैया प्रदान गरिने आयोजकले जनाएको छ । यस्तै व्यक्तिगतविधातर्फ स्पाइकर, ब्लकर, सेटर, सर्भर, डिफेन्डरले समान ५ हजार प्राप्त गर्नेछन् ।