काठमाडौं (हाम्रो खेलकुद) – नेक्सस स्कुल छैटौं अर्किड कप सेभेन ए साईड अन्तराबिद्यालय नकआउट छात्र फुटबल प्रतियोगितामा उपाधि उचाल्न सफल भएको छ ।

शुक्रबार सम्पन्न फाईनलमा मनकामना स्कुललाई ३–१ को गोल अन्तरले पराजित गर्दै नेक्सस च्याम्पियन बनेको हो । नेक्ससका लागि तीनै गोल राज मगरले गरेका थिए । खेलको पहिलो मिनेटमा नै राजले गोल गर्दै आफ्नो टोलीलाई अग्रता दिलाए । २६औं मिनेटमा राजले अर्काे गोल गर्दै अग्रता दोब्बर पारे ।

दोस्रो हाफको आठौं मिनेटमा मनकामनाका सुमन सुनारले गोल गर्दै खेलाई २–१ को स्थितिमा ल्याए । त्यसपछि दोस्रो हाफको १५औं मिनेटमा राजले ह्याट्रिक पुरा गर्दै नेक्सको जित पक्का गरे ।

उपाधिसँगै नेक्ससले ३० हजार रुपैयाँसहित ट्रफी र मेडल प्राप्त गरेको छ । दोस्रो भएको मनकामनाले २० हजार र तेस्रो भएको गुड डे एकेडेमीले १० हजार प्राप्त ग¥यो । काँडाघारीस्थित अर्किड स्कुलको आयोजनमा भएको प्रतियोगितामा मनकामनाका अनिष डङ्गोल उत्कृष्ट खेलाडी चुनिए । यस्तै नेक्ससका निशान राना मगर उत्कृष्ट गोलरक्षक भए भने प्रतियोगिताको अनुशासित टोलीको उपाधी गुड डे एकेडेमीले हात पा¥यो ।

बिजयी टिम तथा खेलाडीहरुलाई कागेश्वरी मनोहरा नगरपालिकाका मेयर कृष्णहरि थापा, आयोजक स्कुलका प्रिन्सिपल चोलेन्द्र कार्की लगायतले पुरस्कृत गरे ।