एजेन्सी – पाकिस्तानमा २४ वर्षपछि पहिलो पटक भ्रमण गरेको अष्ट्रेलिया क्रिकेट टोली पहिलो टेस्टको पहिलो दिन निरिह बनेको छ । घरेलु टोली पाकिस्तान रावलपिन्डीमा टस जितेर पहिला ब्याटिङ गर्दै पहिलो दिनको समाप्तिमा ९० ओभरमा २४५–१ को मजबुत अवस्थामा छ ।

पाकिस्तानका बायाँ हाते युवा ओपनर इमाम उल हक २ सय ७१ बलमा १५ चौका र २ छक्कासहित १ सय ३२ रनमा अविजित छन् । घरेलु मैदानको भरपूर्ण फाइदा उठाउँदै इमामले आफ्नो टेस्ट करिअरको पहिलो शतक प्रहार गरे । उनले २ सय बलमा चौका साथ शतक पूरा गरेका थिए । पूर्व कप्तान अजहर अली १ सय ६५ बलमा ४ चौका र १ छक्कासहित ६४ रनमा अविजित छन् ।

दोस्रो विकेटका लागि इमाम र अजहरले १ सय ४० रनको अविजित साझेदारी गरि सकेका छन् । त्यसअघि ओपनर अब्दुल्लाह सफिक १ सय ५ बलमा ३ चौका र १ छक्कासहित ४४ बलमा क्याच आउट भए । उनलाई स्पिनर नाथन लायनले प्याट कमिन्सबाट क्याच गराउँदै शतकीय ओपनिङ साझेदारी तोडेका थिए । पहिलो विकेटका लागि सफिक र हकले ३४ ओभरमा १ सय ५ रनको उत्कृष्ट शतकीय साझेदारीका साथ सुरुवात दिलाए ।

एक महिना अघि एसेज सिरिजमा इंग्ल्यान्डविरुद्ध सानदार बलिङ गरेका अष्ट्रेलिया तीव्र गतिका बलर पहिलो दिन भने निरिह बनेका छन् । मिचेल स्टार्क, प्याट कमिन्स र जोश हेजलवुड जस्ता विश्वस्तरिय उत्कृष्ट तीव्र गतिका बलर टोलीमा रहेपनि पहिलो दिन अष्ट्रेलिया बलरको पाकिस्तानका ब्याटर सामू निरिह जस्तै बन्न पुगे ।