काठमाडौं (हाम्रो खेलकुद) – एभिसी एसियन सेन्ट्रल जोन महिला भलिबल च्याम्पियन नेपाली महिला टोलीलाई नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले विशेष सम्मान गरेको छ ।

गोदावरी नगरपालिकाको बज्रबाराही मन्दिर परिसरमा जारी १६ औं एनएनआईपीए स्पोर्ट्स अवार्डको क्रममा महिला भलिबल टोलीलाई सम्मान गरेको हो । भलिबल टोलीका खेलाडीलाई एनएनआईपीएका अध्यक्ष दीपक श्रेष्ठ, कार्यक्रमका प्रमुख अथिति, युवा तथा खेलकुद मन्त्री महेश्वरजंग गहतराज र गोदावारी नगरपालिका प्रमुख गजेन्द्र महर्जनले च्याम्पियन महिला खेलाडी र सदस्यलाई सम्मान गरेका थिए । अवार्डमा २०७७ मा २७ खेलका उत्कृष्ट खेलाडीहरु सम्मान हुनेछन् ।

महिला टोलीले गत पुषमा बंगलादेशको ढाकामा सम्पन्न भएको फाइनलमा उज्वेकिस्तानलाई ३–२ को रोमाञ्चक सेटमा सानदार जित निकाल्दै उपाधि रक्षा गरेको थियो । बंगलादेशको ढाका मिरपुरस्थित शाहिद शुरवार्दी इन्डोर हलमा मंगलबार भएको उपाधि भिडन्तमा उज्वेकिस्तानले कठिन चुनौती पेश गरेपनि नेपालले त्यो चुनौतीलाई चिर्दै २६–२४, २४–२६, २५–१५, २२–२५ र १५–१० ले आफ्नो पक्षमा पार्दै उपाधि जित्न सफल भयो ।

यसअघि नेपालले २०१९ मा माल्दिभ्सलाई हराउँदै एक सेट पनि नगुमाई उपाधि जितेको थियो । यसपटकको च्याम्पियनसिपमा श्रीलंका र उज्वेकिस्तान थपिदा नेपालले दुवै टोलीसँग समान २–२ सेट गरी ४ सेट गुमाउन पुगेको थियो । नेपालले १८ सेट आफ्नो पक्षमा पारेको थियो ।