काठमाडौं (हाम्रो खेलकुद) – वीर गणेशमान सिंह स्पोर्ट्स कमिटीले गणेशमान सिंहको स्मृतिमा तीन राष्ट्रिय स्तरको प्रतियोगिता आयोजना गर्ने भएको छ ।

गणेशमान सिंह स्पोर्ट्स कमिटीले काठमाडौंमा सोमबार पत्रकार सम्मेलन गरी गणेशमान सिंह राष्ट्रिय फेन्सिङ, बक्सिङ र १० के रोड रेस आयोजना गर्ने घोषणा गरेको हो । जस अनुसार फागुन २१ देखि २३ गते सम्म वीर गणेशमान सिंह राष्ट्रिय फेन्सिङ प्रतियोगिता आयोजना हुनेछ ।
वैशाख ६ देखि १० गतेसम्म वीर गणेशमान सिंह राष्ट्रिय बक्सिङ प्रतियोगिता र त्यसपछि १७ बैशाखमा १० के रोड रेस आयोजना हुने कमिटीका संयोजक सञ्जिव तुलाधरले जानकारी दिए ।

फेन्सिङमा चार प्रदेश (प्रदेश १, बागमती, गण्डकी र सुदूरपश्चिम) सँगै दुई विभाग नेपाली सेना र सशस्त्र प्रहरी बल एपिएफको सहभागिता रहनेछ । फेन्सिङमा महिला तथा पुरुषमा समान तीन इभेन्ट्समा प्रतिस्पर्धा हुनेछ । हरेक टोलीमा २४ खेलाडी रहने र प्रतियोगितामा १२ स्वर्ण पदकका लागि प्रतिस्पर्धा हुने बताइएको छ ।
बक्सिङमा ७ प्रदेश र तीन विभाग (सेना, प्रहरी र शसस्त्र प्रहरी) को सहभागिता रहनेछ । बक्सिङमा प्रदेश छनोट पार गरेर आउने खेलाडीले राष्ट्रिय प्रतियोगितामा भाग लिने बताइएको छ । बक्सिङ ओलम्पिक तौलअनुसार पुरुषतर्फ ७ र महिलातर्फ ५ गरी १२ तौल समूहमा प्रतिस्पर्धा हुनेछ । ९१ केजी तौलसमुहमा भन्दा माथि खेलाडी नभएकाले पुरुषमा ७ विधा समावेश गरिएको बक्सिङ प्रतियोतिाका संयोजक राजीव श्रेष्ठले जानकारी गराए ।

तेस्रो गणेशमान सिंह स्मृति १० के रोड रेसमा अर्को विधाका रुपमा ५ किलोमिटरको दौड पनि समावेश गरिएको आयोजकले जनाएको छ । प्रतियोगितामा जो कोहिले भाग लिन पाउने र एक महिना अघिबाट नाम दर्ता खुला गरिने रेस डाइरेक्टर शुसिलनर सिंह राणाले जानकारी दिए ।
फेन्सिङका लागि २५ लाख, बक्सिङका लागि ५० लाख र रोड रेसका लागि १५ लाख गरि तीन प्रतियोगिताका लागि झण्डै ९० लाख रुपैयाँ खर्चको अनुमान गरिएको आयोजक कमिटीले गरेको छ । सोही अवसरमा स्पोर्टस कमिटी संयोजक तुलाधरलेले ब्याडमिन्टन प्रतियोगिताका संयोजक पत्र दीपक थापालाई हस्तान्तरण गरेका थिए ।