धनगढी (हाम्रो खेलकुद) – सुदूरपश्चिम प्रदेश खेलकुद परिषद्को आयोजनामा धनगढीमा मुख्यमन्त्री कप राष्ट्रिय पुरुष भलिबल प्रतियोगिता हुने भएको छ ।

आयोजकले सोमबार पत्रकार सम्मेलन गरी प्रतियोगिता ७ देखि १२ चैतसम्म हुने जानकारी गराएको हो । प्रतियोगितामा सात प्रदेश र तीन विभागीय गरी १० टोलीको सहभागिता रहने परिषद्का सदस्य सचिव दिपक बहादुर सिंहले जानकारी दिए ।

प्रतियोगिताको विजेताले ४ लाख, दोस्रो हुनेले २ लाख, तेस्रो र चौथो स्थान प्राप्त गर्ने टिमले क्रमशः १ लाख र ५० हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीलाई २० हजार रुपैया प्रदान गरिनेछ ।

यस्तै उदियमान खेलाडी, उत्कृष्ट लिष्टर, उत्कृष्ट स्पाईकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर र उत्कृष्ट प्रशिक्षकलाई जनही १० हजार सहित पुरस्कृत गरिनेछ । प्रत्येक खेलका म्यान अफ द म्याचलाई नगद १ हजार ५ सय प्रदान गरिने आयोजकले जनाएको छ ।

‘सुदुरपश्चिम प्रदेश खेलकुद परिषद्को गठन भए पश्चात सुदुरपश्चिमको खेलकुद क्षेत्रको विकास गर्नका लागि विभिन्न प्रतियोगिताहरु आयोजना गर्दै आएको छ ।’ सदस्य सचिव सिंहले भने, ‘सुदुरपश्चिम प्रदेश सरकारले थालनी गरेको मुख्यमन्त्री कप अन्तर्गत आगामी चैत ७ गतेदेखि १२ गतेसम्म धनगढीमा मुख्यमन्त्री कप राष्ट्रिय पुरुष भलिबल प्रतियोगिता आयोजनाको तयारी सुरु गरेका हौं ।’ सुदुरपश्चिम प्रदेशको टिमलाई बन्द प्रशिक्षणमा राखेर प्रशिक्षण दिईने काम भईरहेको सदस्य सचिव सिंहले बताए ।