काठमाडौं (हाम्रो खेलकुद) – विभागीय त्रिभुवन आर्मी र टाइम्स बास्केटबल क्लब लामा टेन्डी शेर्पा स्मृति खुला बास्केटबल प्रतियोगिताको पुरुषमा बुधबार फाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको पहिलो सेमिफाइनलमा आर्मीले रोयल बास्केटबल एकेडेमीलाई ८२–७३ ले पराजित गर्दै फाइनलमा स्थान पक्का गरेको हो । आर्मीका रोविन खत्रीले १७ अंक जोडे । रोयलका निकेश मगरले २५ स्कोर गरेपनि टिमलाई जित दिलाउन सकेनन् ।

सुरुका तीन क्वाटरमा आर्मीले २१–१८, २४–१३ र १९–१६ को अग्रता लिदै जितको आधार खडा गरेको थियो । अन्तिम तथा चौथो क्वाटरमा आर्मी १८–२६ ले पछि परेपनि सुरुवाती तीन क्वाटरको अग्रता आर्मीलाई फाइनल पुग्न पर्याप्त बन्यो ।

हारसंगै रोयल दोहोरो फाइनल खेल्नबाट चुक्यो । महिलाको राउन्ड रोविन लिगमा भने रोयल विजेता बन्दै फाइनल पुगिसकेको छ । रोयलले नेपाल प्रहरीसँग उपाधि भिडन्त पक्का गरेको हो ।

अर्को सेमिफाइनलमा टाइम्सले गोल्डेनगेटलाई ८४–६७ ले हराउँदै फाइनलमा आर्मीसँगको भेट पक्का ग¥यो । टाइम्सका विजय बुर्जाले २५ अंक बटुले । चौथो क्वाटर २०–२० को बराबरीमा टुंगिदा सुरुवाती तीन क्वाटरमा टाइम्सले २३–१४, २३–१९ र १८–१४ को अग्रता लिएको थियो ।

महिलातर्फ राउन्ड रोविन लिगको अन्तिम खेलमा रुपन्देहीले कीर्तिपुरलाई ४५–४१ ले पन्छायो । रुपन्देहीकी दीपिका गुरुङले २२ स्कोर गरिन् । कीर्तिपुरका लागि प्रजिता कार्कीले १५ अंक जोडिन् । पाँच टिम सहभागी महिलामा रुपन्देही चौथो भयो । पराजित कीर्तिपुर पुछारमा रह्यो ।

ललितपुर हाइले तेश्रो स्थानमा स्पर्धा टुंगायो । नेपाल बास्केटबल संघका अध्यक्ष लामा टेन्डी शेर्पाको स्मृतिमा भइरहेको प्रतियोगिताको फाइनल बिहीबार हुने छ ।