काठमाडौं (हाम्रो खेलकुद) – सफल भलिबल प्रशिक्षक जगदिश प्रसाद भट्ट सेन्ट्रल एसियन भलिबल फेडेरेसन (काभा) को विकास र प्रशिक्षण समिति (डेभलपमेन्ट एण्ड कोचिङ कमिटी) को सदस्यमा नियुक्त भएका छन् ।

काभाले प्रशिक्षक भट्टलाई झण्डै दुई साता अघि विकास र कोचिङ कमिटीको सदस्यमा नियुक्त गरेको जनाएको छ । नेपाली भलिबलमा विगत ३० वर्षदेखि अब्बल खेलाडी र कुशल प्रशिक्षकको रुपमा रहेका भट्टलाई नेपाली भलिबलमा सफल प्रशिक्षकको रुपमा रहेका छन् ।

काभाले उनलाई सन् २०२० देखि २०२३ को प्रोजेक्ट अन्तरगत अब बाँकी रहेको एक सिजनका लागि सदस्यमा नियुक्त गरेको जनाएको छ । काभाले विश्व भलिबल फेडेरेसन (फिभ) र एसियन भलिबल कन्फेडेरेसन (एभिसी) सँग सहकार्य गर्दै काभाले आफ्नो जोनको भलिबल र बिच भलिबलको विकासको लागि कार्य गर्दै आइरहेको छ ।

भटट् प्रशिक्षक रहँदा नेपाली पुरुष राष्ट्रिय पुरुष भलिबल टोलीले सन् २०१७ मा मल्दिभ्समा भएको तेस्रो सेन्ट्रल जोन सिनियर एसियन पुरुष भलिबलमा कास्य पदक जितेका थियौं । पुरुष भलिबलको ४२ वर्षे इतिहासमा पहिलोपटक पदक जित्दा उनी टोलीमा प्रशिक्षक रहेका थिए ।

भट्टकै प्रशिक्षणमा नेपाली महिला राष्ट्रिय टोलीले सन् २०१९ मा बंगलादेशमा भएको पहिलो एभिसी एसियन सेन्ट्रल जोनको च्याम्पियन बनेको थियो । जुन नेपाली महिला भलिबल इतिहासकै पहिलो स्वर्ण पदक थियो । सोही वर्ष नेपालमै भएको १३औं दक्षिण एसियाली खेलकुद (साग) मा नेपालले सागको इतिहासमा ऐतिहासिक रजत पदक जित्दा उनी नै टोलीको मुख्य प्रशिक्षक थिए ।

यसैवर्ष गत पुसमा बंगलालेशमै भएको सेन्ट्रल जोन च्याम्पियनसिपमा नेपाललाई च्याम्पियन बनाउँदा उनी नै टोलीको मुख्य प्रशिक्षक थिए । नेपालले सेन्ट्रल जोन लगातार दोस्रो वर्ष जित्दै उपाधि रक्षा गर्न सफल भएको थियो ।