काठमाडौं (हाम्रो खेलकुद) – गोल्डेनगेट समूह विजेता बन्दै लामा टेन्डी शेर्पा स्मृति खुला बास्केटबल प्रतियोगिताको पुरुषमा बिहीबार क्वाटरफाइनलमा प्रवेश गरेको छ ।

तीन टिम रहेको समूह ‘डि’ को लिग खेलमा गोल्डेनगेटले क्याम्पियन सोलोलाई ७७–६३ ले पराजित गर्दै समूह विजेता बनेको हो न्यो । विजेताका कर्मा गुरुङले २७ अंक जोडे । क्याम्पियनका मनीष राजोपाध्यायले १७ स्कोर गरे । लिगको आफ्नो पहिलो खेलमा गोल्डेनगेटले एसीसीएसलाई हराएको थियो ।

पहिलो क्वाटरमा १६–१४ को अग्रता लिएको गोल्डेनगेट दोश्रोमा १३–१४ ले पछि प¥यो । बाँकी क्वाटरको नतिजा आफ्नो पक्षमा पारेको गोल्डेनगेटले १६–१२ र ३२–२३ अंक जोड्यो ।

रोयलले जेभियर इन्टरनेसनल कलेजलाई ९८–६७ ले पन्छायो । रोयलका विकास गुरुङले २२ तथा जेभियरका अनिश मगरले १५ अंक बटुले । सबै क्वाटरमा अग्रता बनाएको रोयलले १५–१४, २७–२१, २८–२० र २८–१२ अंक जोड्यो ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भइरहेको प्रतियोगितामा महिलातर्फ रोयलले नेपाल प्रहरी क्लबलाई ५१–५० को साँघुरो अन्तरले हरायो । रोयलकी छिरिङ शेर्पाले २४ अंक जोड्दा प्रहरीकी रोशनी श्रेष्ठले १५ स्कोर गरिन् । तेश्रो क्वाटर सकिँदासम्म प्रहरी ३५–३३ ले अगाडि थियो ।

अन्तिम तथा चौथो क्वाटरमा रोयलले १८–१५ स्कोर गर्दै समग्रमा खेल १ अंकले जित्यो । त्यसअघि रोयल सुरुका दुई क्वाटरमा ६–११ र ९–१० ले पछि थियो । तेश्रो क्वाटरमा रोयलले १८–१४ स्कोर गर्दै अंक अन्तरलाई छोट्याएको थियो ।