काठमाडौं (हाम्रो खेलकुद) – नेपाल बास्केटबल संघका अध्यक्ष स्व. लामा टेन्डी शेर्पाको सम्झनामा हुन लागेको लामा टेन्डी शेर्पा स्मृति खुला पुरुष तथा महिला बास्केटबल प्रतियोगिताको तयारी पूरा भएको भएको छ ।

सोमबारदेखि शुरु हुने प्रतियोगिताको सम्पुर्ण तयारी पूरा भएको प्रतियोगिता संयोजक विकास शाहीले जानकारी गराए । प्रतियोगिता त्रिपुरेश्वरस्थित राष्ट्रिय खेलकुद परिषद्को कभर्डहलमा सुरु हुँदैछ ।

नेपाल बास्केटबल संघकै आयोजनामा हुन लागेको प्रतियोगितामा पुरुषतर्फ १३ टिम मात्र सहभागी हुने भएका छन् । यसअघि १४ टिम सहभागी हुने भनिएकोमा बंगालादेशको नेभी टिम नआउने भएको आयोजकले जनाएको छ । सहभागी टिमलाई ४ समूहमा विभाजन गरी लिग कम नकआउट आधारमा खेलाइने छ ।

महिलातर्फ भने पाँचै टिमको सहभागिता रहने छ । राउन्ड रविन लिगका आधारमा हुने स्पर्धामा शीर्ष २ स्थानमा रहने टिमले उपाधिका लागि पुनः प्रतिस्पर्धा गर्ने छन् । पहिलो दिन ३ खेल हुनेछ । पुरुषको २ र महिलाको १ खेल हुनेछ ।

उद्घाटन खेलमा पुरुषतर्फ बीएमके र कीर्तिपुर नगरपालिकाले प्रतिस्पर्धा गर्नेछन् । पुरुषमै अर्को खेल ड्रिम टिम र शंकरदेव क्याम्पसबीच हुनेछ । महिलामा ललितपुर हाइ र रोयल बास्केटबल एकेडेमीले खेल्नेछन् । फाइनल फागुन १२ गते हुनेछ ।