एजेन्सी – कीर्तिमानी २१ पटक ग्रान्डस्लाम उपाधि जित्ने संघारमा रहेको स्पेनिस टेनिस खेलाडी राफयल नाडालले अष्ट्रेलियन ओपनको फाइनलमा रसियन ड्यानिल मेडभेडेभ प्रतिद्धन्द्धी पाएको छ ।

मेलवर्न पार्कमा शुक्रबार भएको दोस्रो सेमिफाइनमा ग्रीसका स्टेफानोस सिट्सीपासलाई ३–१ को सेटमा पराजित गर्दै मेडभेडेभ लगातार दोस्रो वर्ष फाइनलमा पुग्न सफल भएको हो ।

दोस्रो वरीयताका मेडभेडेभले चौथो वरीयताका स्टेफानोस सिट्सीपासलाई पहिलो सेटमा ७–६ (७–५) को संघर्षपूर्ण जित निकालेको थियो ।दोस्रो सेट ४–६ ले गुमाएपनि त्यसपछि मेडेभेडेभले उच्च प्रदर्शन गर्दै ६–४ र ६–१ को एकपक्षीय जित निकाल्दै फाइनलमा नाडालसँगको भेट पक्का गरेको हो । फाइनल आइतबार हुनेछ ।

२५ वर्षीय मेडभेडेभ समग्रमा चौथोपटक कुनैपनि ग्रान्डस्लामको फाइनलमा प्रवेश गरेको हो । यसअघि तीन फाइनल खेल्दा एकपटक च्याम्पियन बनेको मेडभेडेभले गत वर्ष युएस ओपनमा शीर्ष वरीयताका नोभाक जोकोभिचलाई हराएका थिए । २०२१ कै अष्ट्रेलियन ओपनमा जोकोभिचसँग हार भोगेको मेडभेडेभले २०१९ को युएस ओपनमा राफायल नाडालसँग पराजित भएको थियो ।

नाडालले शुक्रबारै इटालीका माटियो बेरारटिनीलाई ६–३, ६–२, ३–६ र ६–३ को सेटमा हराउँदै फाइनलमा स्थान सुरक्षित गरेको थियो । नाडाल छैटौंपटक अष्ट्रेलियन ओपनको फाइनलमा प्रवेश गर्दा सन् २०१९ पछि फाइनलमा प्रवेश गरेका हुन् ।

नाडालले २००९ मा स्वीस रोजर फेडेररलाई हराएर पहिलोपटक अष्ट्रेलियन ओपनको उपाधि जितेको थियो । त्यसयता उनले २०१२, २०१४, २०१७ र २०१९ मा फाइनलको यात्रा तय गरेपनि च्याम्पियन बन्न भने सकेका छैनन् । नाडालले फ्रेन्च ओपन सर्वाधिक १३ पटक, युएस ओपन ४ पटक, विम्वल्डन २ पटक र एकपटक अष्ट्रेलियन ओपन गरी कुल २० ग्रान्डस्लाम जितेका छन् ।

नाडालले २०१९ मै फ्रेन्च र युएस ओपन जितेका थिए । त्यसयता उनी उपाधिविहीन थिए । नाडाल समग्रमा २९औं पटक ग्रान्डस्लामको फाइनलमा पुगेका हुन् । उनले जसमध्ये २० उपाधि जितेका छन् । चारपटक अष्ट्रेलियन ओपनको फाइनलमा पराजित नाडाल २००६, २००७, २०११ मा विम्वल्डन र २०११ मा युएस ओपनको फाइनलमा पराजित भएको थियो ।