एजेन्सी – पाँचौ वरीयताका स्पेनिस टेनिस खेलाडी राफयल नाडाल अष्ट्रेलियन ओपनको फाइनलमा प्रवेश गरेका छन् । मेलवर्न पार्कमा शुक्रबार भएको सेमिफाइनलमा नाडालले इटालीका माटियो बेरारटिनीलाई ३–१ को सेटमा हराएर उपाधि नजिक पुगेका हुन् ।

सातौं वरीयताका बेरारटिनीमाथि नाडालले ६–३, ६–२, ३–६ र ६–३ को सेटमा जित निकाल्दै २१औं ग्रान्डस्लामको जित नजिक पुगेको हो । २१औं ग्रान्डस्लाम उपाधि जित्ने अभियानमा रहेका ३५ वर्षीय नाडाल छैटौंपटक अष्ट्रेलियन ओपनको फाइनलमा प्रवेश गर्दा सन् २०१९ पछि फाइनलमा प्रवेश गरेका हुन् ।

नाडालले २००९ मा स्वीस रोजर फेडेररलाई हराएर पहिलोपटक अष्ट्रेलियन ओपनको उपाधि जितेको थियो । त्यसयता उनले २०१२, २०१४, २०१७ र २०१९ मा फाइनलको यात्रा तय गरेपनि च्याम्पियन बन्न भने सकेका छैनन् ।

अब नाडालले उपाधिका लागि ड्यानिल मेडेभेडेभ र स्टेफानोस सिट्सीपासबीचको विजेतासँग आइतबार खेल्नेछ । यि दुईबीच आज नै प्रतिस्पर्धा हुदैछ ।

नाडालले फ्रेन्च अ‍ोपन सर्वाधिक १३ पटक, युएस ओपन ४ पटक, विम्वल्डन २ पटक र एकपटक अष्ट्रेलियन ओपन गरी कुल २० ग्रान्डस्लाम जितेका छन् । नाडालले २०१९ मै फ्रेन्च र युएस ओपन जितेका थिए । त्यसयता चोटसँग जुध्न पुग्दा उनले कुनैपनि उपाधि जित्न सकेका छैनन् ।

नाडाल समग्रमा २९औं पटक ग्रान्डस्लामको फाइनलमा पुगेका हुन् । उनले जसमध्ये २० उपाधि जितेका छन् । चारपटक अष्ट्रेलियन ओपनको फाइनलमा पराजित नाडाल २००६, २००७, २०११ मा विम्वल्डन र २०११ मा युएस ओपनको फाइनलमा पराजित भएको थियो ।