एजेन्सी – पाँचौ वरीयताका स्पेनिस टेनिस खेलाडी राफयल नाडाल अष्ट्रेलियन ओपनको क्वाटरफाइनलमा प्रवेश गरेका छन् । मेलवर्न पार्कमा आइतबार भएको प्रि–क्वाटरफाइनलमा नाडालले फ्रान्सेली एड्रियन मान्नारिनोलाई ३–० को सोझो सेटमा पराजित गर्दै अनितम आठमा पुग्न सफल भएको हो ।

२१औं ग्रान्डस्लाम उपाधि जित्ने अभियानमा रहेका ३५ वर्षीय नाडालले पहिलो सेटमा ७–६ (१६–१४) को कठिन जित निकालेपनि त्यसपछिको दुवै सेट समान ६–२ र ६–२ ले आफ्नो पक्षमा पार्न सफल भएको थियो । पहिलो सेटपछि चोट बोक्न पुगेको एड्रियनले त्यसपछिको सेटमा नाडाललाई बलियो चुनौती पेश गर्न सकेन ।

अब नाडालले क्वाटरफाइनलमा सापोभालोभसँग प्रतिस्पर्धा गर्नेछ । क्यानडाका २२ वर्षीय सापोभालोभले जर्मनीका स्वर्ण विजेता एलेक्सन्डर जेभेरेभलाई ३–० को सोझो सेटमा पराजित गर्दै क्वाटरफाइनलमा प्रवेश गरेको छ ।

१४औं वरीयताका सापोभालोभ पहिलोपटक क्वाटरफाइनलमा प्रवेश गर्न सफल भएको हो । तेस्रो वरीयताका जेभेरेभको हारले अब अष्ट्रेलियन ओपनमा नाडाल मात्रै अघिल्लो चरण प्रवेश गर्ने शीर्ष वरीयता एक्लो खेलाडी बनेका छन् ।

यस्तै उनी क्वाटरफाइनलमा पुग्ने उनी एकमात्रै पूर्व च्याम्पियन हुन् । उनले २००९ मा स्वीस रोजर फेडेररलाई हराएको पहिलोपटक अष्ट्रेलियन ओपनको उपाधि जितेको थियो । त्यसयता उनले २०१२, २०१४, २०१७ र २०१९ मा फाइनलको यात्रा तय गरेपनि च्याम्पियन बन्न भने सकेका छैनन् ।