सुष्मा बक्सिङ च्याम्पियनसिप खेल्नबाट बञ्चित

काठमाडौं (हाम्रो खेलकुद) – नेपाली बक्सिङ खेलाडी सुष्मा तामाङले एएसबीसी यू–२२ पुरुष तथा महिला बक्सिङ च्याम्पियनसिपमा सहभागिता जनाउन नपाउने भएकी छिन् ।

उज्वेकिस्तानको तस्कन्त शहरमा हुने च्याम्पियनसिपका लागि बुधबार राति गरिएको पीसीआर परिक्षणमा पोजेटिभ नतिजा आएपछि अन्तिम समयमा प्रतियोगिता खेल्नबाट बञ्चित हुने नेपाल बक्सिङ संघले जनाएको छ ।

अब एशियन बक्सिङ कन्फेडेरेशनको निमन्त्रणा एवं उजवेकिस्तान बक्सिङ संघको आयोजनामा हुने एएसबीसी यु–२२ पुरुष तथा महिला बक्सिङ च्याम्पियनसिपमा नेपालको सहभागिता हुने छैन ।

जनवरी २० देखि ३० सम्म हुने सो च्याम्पियनसिपमा नेपालबाट सुष्माले मात्र सहभागिता जनाउने तय भएको थियो । उज्वेकिस्तान जाने टोलीलाई युवा तथा खेलकुद मन्त्री महेश्वर जंग गहतराजले आफ्नै निवासबाट बिदाई गरेका थिए ।

सुष्माले सो च्याम्पियनसिपमा ४८ केजी तौल समुह मुनि प्रतिस्पर्धा गर्ने तालिका थियो । उनको स्वास्थ्य अवस्था सामान्य रहेको र कुनै लक्षण नदेखिएको संघले जनाएको छ । उनीसँगै टिममा जाने प्रमुख प्रशिक्षक प्रकाश थापा मगर र प्रशिक्षक नविन तण्डुकारको भने रिपोर्ट नेगेटिभ आएको जनाइएको छ ।