पोखरा (हाम्रो खेलकुद) – दोस्रो संस्करणको टाइगर कप आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा पुरुषतर्फ टिप टप हेल्प नेपाल र विभागीय त्रिभुवन आर्मी क्लबबीच प्रतिस्पर्धा हुँदैछ ।

फाइनल खेल पोखरा रंगशालास्थित भलिबल कोर्टमा मध्यान्ह १२ः३० बजे हुने आयोजक टाइगर ग्रुप अफ पोखराले जनाएको छ । हेल्प नेपाल लिगर चरणमा पाएको जितलाई निरन्तरता तथा काठमाडौंमा गत असोजमा भएको एनभिए कपको फाइनलमा भोगेको हारको बदला लिदै च्याम्पियन बन्न योजनामा कोर्टमा उत्रनेछ ।

नेपाली पुरुष राष्ट्रिय भलिबल टोलीकै पुर्व सदस्य सन्जय अर्यालको कप्तानीमा कोर्टमा उत्रने हेल्प नेपालसँग तीन भारतीय राष्ट्रिय टोलीका खेलाडीको साथ रहेको छ । विनित कुमार, अमित गुलिया र मथुसामीसँगै सुरेन्द्र बम, नविन महतो, धिरज बस्नेत, दीपक थापा, जगदिश सुवेदी, सन्जय परियार, विवश आले सनोज चौधरी टोलीमा रहेका छन् ।

यता, आर्मी पनि लिग चरणमा भोगेको हारको बदला लिदै च्याम्पियन बन्ने लक्ष्यमा कोर्टमा उत्रनेछ । पहिलो संस्करणको उपविजेता आर्मीले गत असोजमा भएको एनभिए कपमा हेल्प नेपाललाई नै हराउँदै उपाधि जितेको थियो । आर्मी सोही प्रदर्शन दोहो¥याउँदै च्याम्पियन बन्ने लक्ष्यमा हुनेछ ।

राष्ट्रिय खेलाडीको बाहुल्यता रहेको आर्मीसँग कुनै न कुनै समय राष्ट्रिय टोलीबाट खेलेका ११ खेलाडीको साथ रहेको छ । धन बहादुर भट्ट क्षेत्री, मान बहादुर श्रेष्ठ, हरिहजुर थापा, हरि बहादुर अधिकारी, दुर्गा बहादुर खड्का, राजेन्द्र विष्ट, शरन सामरी क्षेत्री, भैरव बम, दिल सुनार, दुर्गा महतो, ईश्वर थापा र हृदेश चौधरी रहेका छन् ।

२६ पुसदेखि शुरु भएको प्रतियोगितामा महिला तथा पुरुषतर्फ समान ५–५ टोलीको सहभागिता रहेको छ । महिला र पुरुषतर्फको विजेताले समान ३ लाख, उपविजेता टोलीले १ लाख ५० हजार, तेस्रो हुनेले ७५ हजार र सान्त्वना हुने टोलीले ३५ हजार प्राप्त गर्नेछ । महिला तथा पुरुषतर्फको सर्वाेत्कृष्ट खेलाडीले समान २५ हजार प्राप्त गर्नेछ । हरेक विधाका उत्कृष्ट (स्पाइकर, सेटर, ब्लकर, सर्भर, लिवेरो र प्रशिक्षक) ले समान १०–१० हजार रुपैया हात पार्नेछन् ।