पुलिसलाई हराउँदै आर्मी फाइनलमा

पोखरा (हाम्रो खेलकुद) – साविक विजेता विभागीय नेपाल पुलिस क्लबलाई पराजित गर्दै त्रिभुवन आर्मी क्लब दोस्रो संस्करणको टाइगर कप आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिताको महिलातर्फ फाइनलमा प्रवेश गरेको छ ।

पोखरा रंगशालास्थित भलिबल कोर्टमा शुक्रबार भएको राउन्ड रोविनको अन्तिम खेलमा आर्मीले पुलिसलाई ३–१ को सेटमा पराजित गर्दै फाइनलमा स्थान पक्का गरेको हो ।

पहिलो सेट २१–२५ ले गुमाएपनि आर्मीले त्यसपछिको तीन सेट आफ्नो पक्षमा पार्दै उपाधिनजिक पुगेको हो । दोस्रो सेट २५–१८ ले जितेको आर्मीले तेस्रो सेट २५–२१ ले आफ्नो पक्षमा पारेको थियो । चौथो सेटमा उच्च प्रदर्शन गरेको आर्मीले २५–१३ को सहज जित निकाल्न सफल भयो ।

जितसँगै आर्मीले चार खेलबाट ९ अंक जोड्यो । पराजित पुलिसको ३ खेलबाट ३ अंक छ । एपिएफको ५ तथा होङ्गान्जी न्यु डायमन्डको ७ अंक छ । आयोजक टाइगर ग्रुप अफ पोखराले अंकको आता खोल्न सकेको छैन ।

अब न्यू डायमन्ड र एपिएफमध्ये एक टोली फाइनलमा प्रवेश गर्नेछ । डायमन्डले पुलिससँग खेल्न बाँकी छ ।