पोखरा (हाम्रो खेलकुद) – विभागीय त्रिभुवन आर्मी क्लब र टिप टप हेल्प नेपालले दकोस्रो संस्करणको टाइगर कप आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा पुरुषतर्फ लगातार जित निकाल्दै फाइनल पुग्ने सम्भावना जीवित राखेको छ ।

पोखरा रंगशालास्थित भलिबल कोर्टमा बिहीबार भएको खेलमा आर्मीले साविक विजेता गण्डकी प्रदेशमाथि ३–१ को सेटमा जित निकाल्दै फाइनल पुग्ने सम्भावना जीवित राखेको हो ।

पहिलो सेटमा आर्मी २५–१५ ले विजयी भएको थियो । दोस्रो सेट २०–२५ ले गुमाएको आर्मीले तेस्रो सेट २५–१५ ले नै आफ्नो पक्षमा पार्दै खेलमा फर्किएको थियो । प्रतिस्पर्धात्मक बनेको चौथो सेटमा आर्मीले २४–२३ को अवस्थाबाट दुई अंक जोड्दै २६–२४ को जित निकाल्न सफल भएको हो ।

जितसँगै आर्मीको तीन खेलबाट ६ अंक पुगेको छ । आर्मीसँगको हारसँगै साविक विजेता गण्डकी प्रदेश प्रतियोगिताबाट बाहिरिएको छ । एक खेल बाँकी रहेको गण्डकीको ३ खेलबाट ३ अंक नै छ ।

अर्काे खेलमा टिप टप हेल्प नेपाल स्पोर्ट्स क्लबले विभागीय नेपाल एपिएफ क्लबलाई ३–१ को सेटमा पराजित गर्दै फाइनल पुग्ने सम्भावना जीवित राखेको छ । पहिलो सेट २३–२५ ले गुमाएको हेल्प नेपालले त्यसपछिको तीनै सेट २५–२०, २५–१५ र २५–१९ ले आफ्नो पक्षमा पार्न सफल भयो ।

जितसँगै हेल्प नेपालको तीन खेलबाट ७ अंक पुगेको छ । लगातार चौथो हार बेहोरेको एपिएफले प्रतियोगितामा अंकको खाता खोल्न सकेन ।अब शुक्रबार हुने खेलबाट नै फाइनल पुग्जे दुई टोलीको टुंगो लाग्नेछ । शुक्रबार गण्डकी र हेल्प नेपाल तथा पुलिस र आर्मीबीच प्रतिस्पर्धा हुनेछ ।