काठमाडौं (हाम्रो खेलकुद) – चन्द्रागिरी नगरपालिका वडा नम्वर १३ ले राष्ट्रिय भलिबल खेलाडी तथा फुटबल खेलाडीलाई नगदसहित सम्मानसँगै होङ्गान्जी न्यु डायमन्ड स्पोर्ट्स क्लबलाई टाइगर कप भलिबलको प्रतियोगिताको लागि बिदाई गरिएको छ ।

चन्द्रागिरी नगरपालिका वडा नम्वर १३ का अध्यक्ष बाल मुकुन्द बिडारीले चन्द्रागिरी नगरपालिका वडा नम्वर १३ का राष्ट्रिय भलिबल खेलाडी (होङ्गान्जी न्यू डायमन्ड स्पोर्ट्स क्लब) का खेलाडी, प्रशिक्षक तथा पुर्व राष्ट्रिय फुटबल खेलाडी रमेश बुढाथोकीलाई एकमुष्ठ १ लाख रुपैयाँ हस्तान्तरण गर्दै सम्मनित गरेको हो ।

सोही अवसरमा पोखरामा सोमबारदेखि शुरु हुने दोस्रो संस्करणको टाइगर कप आमन्त्रित खुल्ला क्लब च्याम्पियनसिप महिला÷पुरुष भलिबल प्रतियोगितामा सहभागिता जनाउन लागेको डायमन्डको टोलीलाई अध्यक्ष विडारीले सफलताको शुभकामनासहित बिदाई गरेको छ । डायमन्ड आइतबार पोखरा प्रस्थान गर्दैछ ।

यसपटक डायमन्ड आफ्नो प्रमुख खेलाडी झरना श्रेष्ठ, प्रतिक्षा गुरुङ र अरुणा शाहीविना नै टाइगर कपमा प्रतिस्पर्धा गर्दैछ । राष्ट्रिय महिला भलिबल टोलीकी कप्तासमेत रहेकी अरुणाले आयोजक टाइगर ग्रुपबाट खेल्नेछिन् । ओपन स्पाइकर झरना श्रेष्ठ वार्षिक परीक्षाका कारण तथा सेटर प्रतिक्षा अध्ययनका क्रममा रहेका कारण टोलीसँग उपलब्ध हुनेछैनन् । यि तीन खेलाडीको अभाव टोलीलाई खड्कन सक्नेछ ।