काठमाडौं (हाम्रो खेलकुद) – माघको तेस्र्रो साता काठमाडौंमा १० किलोमिटरको केटिएम रन आयोजना हुने भएको छ । आयोजक शेर्पा आउटडोरको केटिएम सिटीले शुक्रबार पत्रकार सम्मेलन गर्दै दौड १५ माघमा हुने जानकारी गराएको हो ।

केटीएम रनको पुरुष र महिलातर्फको विजेताले ट्रफीसहित समान १ लाख रुपैया प्राप्त गर्नेछन् । यो पुरस्कार १० किलोमिटर स्पर्धामा अहिलेसम्मकै सर्वाधिक पुरस्कार राशी हुनेछ ।

यस्तै, दोस्रो हुनेले समान ५० हजार, तेस्रोले ३० हजार, चौथो हुनेले २० हजार, पांचौ हुनेले १० हजार, छैटी हुनेले समान ५ हजार रुपैया प्राप्त गर्नेछन् । सातौंदेखि दशौं स्थान प्राप्त गर्ने खेलाडीले गिफ्ट भौचर प्रदान गरिने आयोजकले जनाएको छ ।

यस्तै आयोजकले हरेक अंग्रेजी नयाँ वर्षको अन्तिम शनिबार १० किमि दौडलाई निरन्तरता दिने जानकारी गराएको छ । केटीएम रनमा सहभागी हुने खेलाडीका लागि ९ सय ९० रुपैया दर्ता शुल्क राखिएको छ । सहभागी खेलाडीलाई आयोजकले टिसर्ट सहितका सामाग्री उपलब्ध गराउनेछ ।

केटीएम रनमा राष्ट्रिय तथा अन्तर्राष्ट्रिय खेलाडीको सहभागीता खुल्ला गरिएको छ । खेलाडी दर्ता जनवरी ११ देखि जनवरी २७ सम्म रहनेछ ।
केटीएम रनको रुट काठमाडौंको दरबारमार्गबाट सुरु भएर भद्रकाली हुदै सिंहदरबार, माईतिघर, बानेश्वर पुगेर पुन माईतिघर फर्किएर, थापाथली हुदै त्रिपुरेश्वर, सुन्धारा, न्युरोड, रत्नपार्क, जमल भएर दरबारमार्ग आएरै टुंगिनेछ । केटीएम रनको रेस डिरेक्टरमा सुशील नरसिंह राणा र प्राविधिक संयोजकमा राजन खत्री रहने आयोजकले जनाएको छ ।