काठमाडौं (हाम्रो खेलकुद) – व्यवसायिक माउन्टेन बाइकर मंगल लामाले ग्रेट हिमालयन ट्रेल (जिएचटी अन ह्वील्स्) मा एक्लै माउन्टेन बाइक राइड गर्ने भएका छन् ।

उनले बुधबार पत्रकार सम्मेलन गर्दै पुर्वमा कञ्चनजंघादेखि पश्चिममा हुम्लासम्म हिमालयको उच्च मार्गहरुमा फैलिएको १ हजार ७ सय किलोमिटर लामो ग्रेट हिमालय ट्रेल (जिएचटी) मा एक्लै सवारी राइड गर्ने योजना बनाएको हो । यो ट्रेल १ अप्रिल २०२२ देखि शुरु हुनेछ ।

माउन्टेन बाइकमा यस्तो एकल यात्रा कहिल्यै नभएको र यो नै पहिलो हुनेछ । यसको उद्देश्य हिमलयन समुदायमा कोभिड १९ को महामारी र जलवायु परिवर्तनका चुनौतीबारे चेतना जगाउनु, विशेष गरी जिएचटीलाई प्रमुख साहसिक पर्यटन गन्तव्यको रुपमा प्रवद्र्धन गर्नु र स्थानिय समुदायलाई संलग्न र सशक्त बनाउने रहेको बाइकर लामाले बताए ।

जुनियर मेकानिकको रुपमा र पछि माउन्टेन बाइकिङ गाइड रेसरको रुपमा करिअर अघि बढाएर २००६ देखि पर्यटन उद्योगमा रहँदै आएका छन् । यसक्रममा उनले स्थानिय माउन्टेन बाइक दौडमा भाग लिदै प्रमुख राष्ट्रिय र अन्तर्राष्ट्रिय दौडमा प्रतिस्पर्धा गर्दै १० वर्षको अवधिमा विभिन्न १० उपाधि जितिसकेका छन् ।