काठमाडौं (हाम्रो खेलकुद) – प्रधानमन्त्री शेरबहादुर देउवाले बंगलादेशमा सम्पन्न एभीसी एसियन सेन्ट्रल जोन सिनियर महिला तथा पुरुष भलिबल च्याम्पियनसिप अन्तर्गत महिलातर्फको विजेता बन्न सफल नेपाली टोलीलाई बधाई ज्ञापन गरेका छन् ।

प्रधानमन्त्री देउवाले सामाजिक सन्जाल ट्वीटरबाट नेपाली टोलीलाई बधाई तथा थप सफलताको शुभकामना प्रदान गरेका हुन् । उनले ‘एभीसी सेन्ट्रल जोन महिला च्यालेन्ज कप’ मा लगातार दोस्रोपटक उपाधि जित्न सफल नेपाली राष्ट्रिय महिला भलिबल टिमलाई हार्दिक बधाई ।’ भन्दै ट्वीट गरेका छन् ।

नेपालले मंगलबार बंगलादेशको ढाका मिरपुरस्थित शाहिद शुरवार्दी इन्डोर कभर्डहलमा उज्वेकिस्तानलाई ३–२ को सानदार जित निकाल्दै लगातार दोस्रो संस्करणमा च्याम्पियन बन्दै उपाधि रक्षा गर्न सफल भएको थियो ।

प्रतिस्पर्धात्मक बनेको खेलमा नेपालले २६–२४, २४–२६, २५–१५, २२–२५ र १५–१० ले उज्वेकिस्तानलाई हराउन सफल भएको थियो । लिग चरणमा भने नेपालले ३–० को सोझो सेटमा जित निकालेको थियो ।

नेपालले यसअघि सन् २०१९ मा बंगलादेशमै आयोजित पहिलो संस्करणमा माल्दिभ्सलाई सोझो सेटमा हराएर एक सेट पनि नगुमाई उपाधि उचालेको थियो । यसपटक उपाधि यात्रामा नेपालले ६ खेलमा अपराजित यात्रा कायम राख्न सफल भएपनि सेट गुमाउन पुगेको थियो । नेपालले च्याम्पियनसिपमा कुल ६ खेलमा २२ सेट खेल्दा १८ सेटमा जित र ४ सेट गुमायो । लिग चरणको पहिलो खेलमा श्रीलंकासँग र फाइनलमा उज्वेकिस्तानसँग नेपालले २–२ सेट गुमायो ।

पुरुषतर्फ भने नेपाल चौथो भयो । तेस्रो स्थानको लागि भएको प्रतिस्पर्धामा नेपाल उज्वेकिस्तानसँग १५–२५, १७–२५ र २२–२५ ले नतिजा सुम्पिएको थियो । नेपालले च्याम्पियनसिपमा ५ खेल खेल्दा २ खेलमा जित र ३ खेलमा हार बेहोर्यो । नेपालले लिग चरणमा उज्वेकिस्तान र माल्दिभ्सलाई हराउँदा बंगललादेश, श्रीलंका र उज्वेकिस्तानसँग हार बेहोर्यो ।

२३ डिसेम्वरबाट शुरु भएको च्याम्पियनसिपमा महिलातर्फ आयोजक बंगलादेश, किर्गिस्तान, माल्दिभ्स, नेपाल, श्रीलंका र उज्वेकिस्तान गरी ६ राष्ट्रले राउन्ड रोविन लिगका आधारमा प्रतिस्पर्धा गरेका थिए । पुरुषतर्फको आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको थियो ।