काठमाडौं (हाम्रो खेलकुद) – घरेलु टोली बंगलादेशलाई सोझो सेटमा पराजित गर्दै श्रीलंका एभिसी एसियन सेन्ट्रल जोन भलिबल च्याम्पियनसिप अन्तर्गत पुरुषतर्फको च्याम्पियन बनेको छ ।

ढाका मिरपुरस्थित शाहिद शुरवार्दी इन्डोर कभर्डहलमा मंगलबार भएको फाइनलमा श्रीलंकाले बंगलादेशलाई २८–२६, २५–२० र २५–२० ले पराजित गर्दै उपाधि हात पारेको हो । घरेलु टोलीले पहिलो पहिलो सेटमा श्रीलंकालाई दवाव बढाएपनि दोस्रो र तेस्रो सेटमा खासै दवाव दिन सकेन ।

पुरुषतर्फ उज्वेकिस्तानले नेपाललाई ३–० को सोझो सेटमा हराएर तेस्रो स्थान हासिल गरेको छ । नेपाली पुरुष टोली यसपटक पदकविहीन बन्यो । माल्दिभ्स पुछारमा रह्यो ।

महिलातर्फ नेपालले उज्वेकिस्तानलाई ३–२ को सेटमा पराजित गर्दै उपाधि रक्षा गरेको छ । रोमाञ्चक र प्रतिस्पर्धात्मक खेलमा नेपालले उज्वेकिस्तानमाथि २६–२४, २४–२६, २५–१५, २२–२५ र १५–१० को सानदार जित निकाल्दै च्याम्पियन बन्न सफल भएको हो । नेपाल पहिलो संस्करणमा पनि च्याम्पियन बनेको थियो । महिलातर्फ श्रीलंका तेस्रो, किर्गिस्तान चौथो, बंगलादेश पाँचौ र माल्दिभ्स छैटौ भयो ।

२३ डिसेम्वरबाट ढाकामा शुरु भएको च्याम्पियनसिपमा पुरुषतर्फ ५ र महिलामा ६ राष्ट्रको सहभागिता रहेको थियो । खेलहरु राउन्ड रोविन लिग र त्यसपछि शीर्ष दुई टोलीले फाइनल र तेस्रो र चौथोले तेस्रो स्थानको लागि प्रतिस्पर्धा गरेको थियो ।