काठमाडौं (हाम्रो खेलकुद) – बंगलादेशमा जारी एभिसी एसियन सेन्ट्रल जोन भलिबल च्याम्पियनसिप अन्तर्गत पुरुषतर्फको तेस्रो स्थानको लागि नेपालले आज (मंगलबार) उज्वेकिस्तानसँग खेल्दैछ ।

खेल ढाका मिरपुरस्थित शाहिद शुरवार्दी इन्डोर स्टेडियममा दिउँसो १ः१५ बजे हुनेछ । पुरुष टोली उज्वेकिस्तानलाई हराउँदै कास्यपदक जित्ने लक्ष्यमा कोर्टमा उत्रनेछ ।

सन् २०१७ मा माल्दिभ्समा भएको तेस्रो सस्करणमा नेपालले कास्यपदक जितेको थियो । सो पदक नेपाली भलिबलले जितेको पहिलो ऐतिहासिक पदक बनेको थियो । पुरुष टोली सोही पदक जित्ने लक्ष्यसहित कोर्टमा उत्रनेछ । राउन्ड रोविन लिगमा उज्वेकिस्तालाई ३–१ को सेटमा हराएको नेपाल सोही जितलाई निरन्तरता दिदै कास्यपदक जितने लक्ष्यमा कोर्टमा उत्रनेछ ।

टोलीसँग कप्तान इम बहादुर राना, मानबहादुर श्रेष्ठ, धन बहादुर भट्ट क्षेत्री, हरि बहादुर अधिकारी, दुर्गा बहादुर खड्का, राजेन्द्र विष्ट, विशाल विके, भैरव बम, सरन सामरी क्षेत्री, हरिहजुर थापा, विनोद चन्द र टेक राज अवस्थी रहेका छन् । नेपालले लिग चरणमा उज्वेकिस्तान ३–१ को सेटमा तथा माल्दिभ्सलाई ३–० को सोझो सेटमा पराजित गरेको थियो । बंगलादेशसँग ३–० को तथा श्रीलंकासँग ३–१ को सेटमा हार बेहोरेको थियो ।

यता, लिग चरणको अन्तिम खेलमा बंगलादेशसँग ३–२ को सेटमा पराजित भएपछि उज्वेकिस्तानले तेस्रो स्थानको लागि प्रतिस्पर्धा गर्नुपरेको हो । साविकको उपविजेता उज्वेकिस्तान नेपाललाई हराउँदै कास्य जित्ने लक्ष्यमा कोर्टमा उत्रनेछ ।

पुरुषतर्फको उपाधिका लागि घरेलु टोली बंगलादेश र श्रीलंकाबीच खेल हुँदैछ । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।