काठमाडौं (हाम्रो खेलकुद) – एभिसी एसियन सेन्ट्रल जोन पुरुष तथा महिला भलिबल च्याम्पियनसिपको अर्को संस्करण माल्दिभ्समा आयोजना हुने भएको छ ।

सेन्ट्रल एसियन भलिबल एसोसिएसन (काभा) को बंगलादेशमा सोमबार बसेको बैठकले सन् २०२२ को सेन्ट्रल जोन भलिबल च्याम्पियनसिप माल्दिभ्समा गर्ने निर्णय गरेको हो । मिति नतोकिएपनि अब सन् २०२२ भित्र माल्दिभ्समा सेन्ट्रल जोन भलिबल च्याम्पियनसिप आयोजना हुनेछ ।

माल्दिभ्स भलिबल एसोसिएन (भाम) ले पनि सन् २०२२ को सेन्ट्रल जोन माल्दिभ्सले आयोजना गर्ने पक्का भएको जनाएको छ । माल्दिभ्सले यसअघि तेस्रो संस्करणको च्याम्पियनसिपको आयोजना गरेको थियो । जसमा नेपाली पुरुष भलिबल टोलीले कास्यपदक जित्न सफल भएको थियो । महिलातर्फको पहिलो च्याम्पियनसिप सन् २०१९ मा बंगलादेशमै आयोजना भएको थियो ।

यस संस्करणको सेन्ट्रल जोन बंगलादेशमा जारी छ । च्याम्पियनसिपमा पुरुषतर्फ ५ र महिलातर्फ ६ राष्ट्रको सहभागिता रहेको छ । च्याम्पियनसिपमा नेपालको महिला टोली अपराजित रहदै फाइनल प्रवेश गरिसकेको छ । नेपालले मंगलबार उज्वेकिस्तानसँग उपाधिका लागि खेल्नेछ । पुरुष टोलीले मंगलबारै तेस्रो स्थानको लागि प्रतिस्पर्धा गर्नेछ ।