काठमाडौं (हाम्रो खेलकुद) – लगातार चौथो जित निकाल्दै एभिसी एसियन सेन्ट्रल जोन भलिबल अन्तर्गत महिलातर्फको फाइनलमा स्थान पक्का गरिसकेको नेपालले आज राउन्ड रोविनको अन्तिम खेलमा किर्गिस्तानसँग प्रतिस्पर्धा गर्दैछ ।

खेल बंगलादेशको ढाका मिरपुरस्थित शाहिद शुरवार्दी इन्डोर स्टेडियममा नेपाली समयअनुसार बिहान ११–१५ बजे हुनेछ । यस खेलमा जित हात पारे नेपाल राउन्ड रोविन लिगको शीर्षस्थानमा रहँदै फाइनलमा प्रवेश गर्नेछ । नेपालले पहिलो खेलमा श्रीलंकासँग ३–२ को सेटमा जित निकाल्दा त्यसपछिको सबै तीन खेलमा ३–० को सोझो सेटमा जित निकालेको छ ।

अपराजित रहेको नेपालको चार खेलबाट ११ अंक छ । दोस्रो स्थानमा रहेको श्रीलंकाको १० तथा उज्वेकिस्तानको ९ अंक छ । नेपालले सन् २०१९ मा किर्गिस्तानसँग राउन्ड रोविनमा प्रतिस्पर्धा गरिसकेको छ । उक्त खेलमा नेपालले ३–० को सोझो सेटमा जित निकालेको थियो । नेपाल सोही जितलाई निरन्तरता दिने लक्ष्यमा कोर्टमा उत्रनेछ ।

टोलीसँग प्रतिभा माली, सरस्वती चौधरी, कप्तान अरुणा शाही, सुनिता खड्का, उषा भण्डारी, साफिया पुन र सलिना श्रेष्ठलगायतको खेलाडीको साथ रहेको छ । यस्तै कामना विष्ट, शान्ति थारु, कृपा अधिकारी, मनिषा चौधरी र लक्ष्मी चन्द पनि टोलीमा छन् ।

नेपालले खेल्नुअघि फाइनल प्रवेशका लागि श्रीलंका र उज्वेकिस्तानबीच प्रतिस्पर्धा हुदैछ । यस खेलमा जित हात पार्ने टोलीले नेपालसँग फाइनल खेल्नेछ । श्रीलंकाको १० तथा उज्वेकिस्तानको ९ अंक छ । दुवै टोलीलाई फाइनलमा स्थान बनाउन जितको आवश्यक छ ।

किर्गिस्तानको ६ तथा बंगलादेश र माल्दिभ्सले अंकको खाता खोल्न सकेको छैन । महिलातर्फ आयोजक बंगलादेश, किर्गिस्तान, माल्दिभ्स, नेपाल, श्रीलंका र उज्वेकिस्तान गरी ६ राष्ट्रको सहभागिता रहेको च्याम्पियनसिपको शीर्ष दुई टोलीले फाइनलमा प्रतिस्पर्धा गर्नेछन् । त्यस्तै, तेस्रो र चौथो टोलीले तेस्रो स्थानको लागि प्रतिस्पर्धा गर्नेछ । फाइनल मंगलबार हुनेछ ।