काठमाडौं (हाम्रो खेलकुद)– श्रीलंकामा आयोजना हुने यू १९ एसिया कप क्रिकेट प्रतियोगिताको तयारी जुट्ने क्रममा आइतबार पहिलो चरणका छनोटमा ५२ खेलाडी समेटिएका छन् । छनोटका लागि देशका विभिन्न ६ सहरमा ट्यालेन्ट हन्ट कार्यक्रम सञ्चालन गरिएको थियो । यसअघि अन्तर्राष्ट्रिय यू १९ प्रतियोगिता खेलिसकेका र त्यसको बन्द प्रशिक्षणमा रहेकालाई भने स्वत पहिलो चरणमा छनोट गराइएको थियो ।

ट्यालेन्ट हन्ट गत साता काठमाडौं, धनगढी, नेपालगन्ज, विराटनगर, भैरहवा र कलैयामा सञ्चालन गरिएको थियो । छनोटमा पर्नेमा विराटनगरबाट मुकुन्द यादव, सन्दीप ढुंगाना, फिर्तोस अन्सारी छन् । कलैयाबाट मोहम्मद आसिफ शेख, अस्चलकुमार शाह, रिजन ढकाल, रसिद खान, पवन सर्राफ, दिवेन्शु मल्लिक, मोहम्मद हुसेन र समसाद आलम छन् ।

त्यस्तै काठमाडौंबाट छानिने जितेन्द्रसिंह ठकुरी, प्रदीप टण्डन, सन्दीप जोहरा,आयुषमान बम, प्रनय शाह, कमल खत्री, पाल्देन लामा, शुभंकर उराव छन् । भैरहवाबाट सुमन पाण्डे, रोहित पौडेल,देव खना, प्रकाश केसी, धिरज शाही, शाह अलाम, किशोर महतो र विक्रम भुसाल छन् । नेपालगन्जबाट रविन्द्र शाही, सुसान्त सिंह थापा, प्रनित थापामगर, विजय चौधरी, अफजल खान छनोटमा परेका छन् । धनगढीबाट पहिलो चरणमा पर्न सफल हुनेमा लोकेश चन्द, भिम सार्की, रोमन बम, अर्जुन साउद, सुरज ऐर, विपिन रावल, अनिलकुमार थापा, विक्रम ढगुन्ना, अमन पन्थी र अनिल विश्वकर्मा छन् ।
यू १९ को पहिलो चरणमा स्वतः छनोट हुनेमा अभिनाष कर्ण, ललितनारायण राजवंशी, सन्दीप सुनार,दीपेन्द्र सिंह ऐरी, नन्दनकुमार यादव, कमलसिंह ऐरी, सागर भण्डारी, सन्दीप लामिछाने छन् ।
अन्तर्राष्ट्रिय क्रिकेट परिषद् (आइसिसी) का प्रतिनिधि वेंकटपती राजु, नेपाली राष्ट्रिय क्रिकेट टोलीका मुख्य प्रशिक्षक र यू १९ प्रशिक्षक विनोद दासको तीन सदस्यीय टोलीले खेलाडीको छनोट गरेको थियो । यू १९ को बन्द प्रशिक्षण शुक्रबारबाट सुरु हुने बताइएको छ । यू १९ डिसेम्बर ८ देखि २२ तारिखसम्म हुनेछ ।