काठमाडौं (हाम्रो खेलकुद) – एभिसी एसियन सेन्ट्रल जोन भलिबल च्याम्पियनसिप अन्तर्गत पुरुषतर्फ नेपालले लिग चरणको अन्तिम खेलमा माल्दिभ्सलाई सोझो सेटमा पराजित गरेको छ ।

बंगलादेशको ढाका मिरपुरस्थित शाहिद शुरवार्दी इन्डोर स्टेडियममा आइतबार भएको खेलमा नेपालले माल्दिभ्सलाई ३–० को सोझो सेटमा पराजित गरेको हो ।

खेलको सुरुवातदेखि नै अग्रता बनाएको नेपालले पहिलो सेट संघर्षपुर्ण रुपमा आफ्नो पक्षमा पार्न सफल भएको थिषे । १६–१२ को अवस्थामा रहेको नेपाल एक समय २१–२२ ले पछि परेपनि त्यसपछि पूनरागमन गर्दै २७–२५ को जित निकाल्न सफल भएको थियो ।

दोस्रो सेटमा पनि सुरुवात देखि अग्रता लिदै नेपालले १८–१६ बाट अग्रता बढाउँदै २५–१९ को जित निकाल्न सफल भएको थियो । तेस्रो सेटमा सुरुवाती अग्रता लिएपनि नेपाल १३–१६ ले पछि परेको थियो । त्यसपछि १७–१७ को बराबरीबाट नेपालले २३–२२ ले अग्रता लिदै २५–२३ को जित निकाल्न सफल भयो ।

च्याम्पियनसिपमा नेपालको यो दोस्रो जित हो । यसअघि नेपालले उज्वेकिस्तानलाई ३–१ को सेटमा पराजित गरेको थियो । नेपालले बंगलादेशसँग ३–० को सोझो सेटमा तथा श्रीलंकासँग ३–१ को सेटमा पराजित भएको थियो ।

यो जितसँगै नेपालको लिग चरणमा ४ खेलबाट ६ अंक पुगेको छ । पराजित माल्दिभ्सले अंकको खाता खोल्न सकेको छैन । एक खेल कम खेलेको उज्वेकिस्तानको ३ अंक छ ।

सोमबार श्रीलंका र माल्दिभ्स तथा बंगलादेश र उज्वेकिस्तानबीच खेल हुनेछ । मंगलबार फाइनल र तेस्रो स्थानको लागि खेल हुनेछ । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।