काठमाडौं (हाम्रो खेलकुद) – बंगलादेशमा जारी एभिसी एसियन सेन्ट्रल जोन भलिबल च्याम्पियनसिप अन्तर्गत पुरुषतर्फ नेपालले लिग चरणको अन्तिम खेलमा माल्दिभ्ससँग प्रतिस्पर्धा गर्दैछ ।

खेल ढाका मिरपुरस्थित शाहिद शुरवार्दी इन्डोर स्टेडियममा नेपाली समयअनुसार दिउँसो ३ः४५ बजे हुनेछ । फाइनल पुग्ने झिनो सम्भावना रहेको नेपाललाई शीर्ष चारमा रहन यो खेलमा जित आवश्यक छ । नेपालको ३ खेलमा ३ अंक छ । उज्वेकिस्तानको पनि ३ अंक नै छ ।

नेपालले पहिलो खेलमा बंगलादेशसँग ३–० को सोझो सेटमा हार बेहोर्दा दोस्रो खेलमा उज्वेकिस्तानलाई ३–१ को सेटमा पराजित गरेको थियो । शनिबार श्रीलंकासँग ३–१ को सेटमा पराजित भएको थियो ।

अंकविहीन रहेको माल्दिभ्सलाई हराउन सके नेपालले शीर्ष चारमा रहँदै फाइनल खेल्न सम्भावना रहँदा तेस्रो र चौथो स्थानको लागि खेल्ने पक्का हुनेछ । लिग चरणमा बंगलादेश र श्रीलंकाको दुई खेलबाट समान ६ अंक छ । नेपाल र उज्वेकिस्तानको समान तीन खेलमा ३ अंक छ । माल्दिभ्सले अंकको खाता खोल्न सकेको छैन ।

टोलीसँग कप्तान इम बहादुर राना, मानबहादुर श्रेष्ठ, धन बहादुर भट्ट क्षेत्री, हरि बहादुर अधिकारी, दुर्गा बहादुर खड्का, राजेन्द्र विष्ट, विशाल विके, भैरव बम, सरन सामरी क्षेत्री, हरिहजुर थापा, विनोद चन्द र टेक राज अवस्थी रहेका छन् ।

यता, माल्दिभ्स पनि नेपाललाई पराजित गर्दै लिग चरणमा पहिलो जित निकाल्दै शीर्ष चारमा रहने सम्भावना बलियो बनाउन चहान्छ । माल्दिभ्सले दुई खेल खेल्दा दुवैमा हार बेहोरेको छ ।

आज नै शीर्ष स्थानमा रहेको बंगलादेश र श्रीलंकाबीच खेल हुनेछ । सोमबार श्रीलंका र माल्दिभ्स तथा बंगलादेश र उज्वेकिस्तानबीच खेल हुनेछ । मंगलबार फाइनल र तेस्रो स्थानको लागि खेल हुनेछ । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।