काठमाडौं (हाम्रो खेलकुद) – सिद्धार्थ बैंकले कामना सेवा फुटसलको उपाधि जितेको छ । शनिबार हाँडीगाउँस्थित धन्यन्तरी फुटसल मैदानमा भएको फाइनल खेलमा माछापुच्छ्रे बैंकलाई हराउँदै सिद्धार्थले उपाधि जितेको हो ।

फाइनल खेलको निर्धारित समय दुई दुई गोलको बराबरीमा सकिएपछि निर्णय ट्राइब्रेकरमा भएको थियो । टाइब्रेकरमा सिद्धार्थ २–१ ले विजयी बन्यो । त्यसअघि निर्धारित समयमा सिद्धार्थको तर्फबाट भाष्कर देवकोटा र राजु श्रेष्ठले गोल गर्दा माछापुच्छ्रेका अभय राना र सञ्जय राना मगरले गोल गरेका थिए ।

उपाधिसँगै सिद्धार्थले ट्रफी, मेडल, प्रमाणपत्र र उत्कृष्ट गिफ्टह्याम्पर प्राप्त गरेको छ । माछापुच्छ्रेका निकेश केसी उत्कृष्ट गोलकिपर ठहरिए । सिद्धार्थका शान्ति राम कार्की सर्वाधिक गोलकर्ता र सिद्धार्थकै भाष्कर देवकोटा प्रतियोगिताको सर्वोत्कृष्ट खेलाडी चुनिए ।

विधागत तर्फका तीनै जना खेलाडीले ट्रफी सहित गिफ्टह्याम्पटर प्राप्त गरे । विजेता टोल्ीलाई एन्फा अध्यक्ष कर्माछिरिङ शेर्पा, कामना सेवाका सञ्चालक विश्वेश्वर सुवेदीलगायतले पुरस्कृत गरे । कामना सेवा विकास बैंकले आयोजनामा शुक्रबारबाट शुरु भएको प्रतियोगितामा विभिन्न २६ टोलीको सहभागिता रहेको थियो ।