काठमाडौं (हाम्रो खेलकुद) – बंगलादेशमा जारी एभिसी एसियन सेन्ट्रल जोन महिला तथा पुरुष भलिबल च्याम्पियनसिप अन्तरगत पुरुषतर्फ नेपालले दोस्रो हार बेहोरेको छ । नेपालले श्रीलंकासँग ३–१ को सेटमा हार बेहोरेको हो ।

ढाका मिरपुरस्थित शाहिद शुरवार्दी इन्डोर स्टेडियममा प्रतिस्पर्धात्मक खेलको पहिलो सेट नेपालले १८–२५ ले गुमाएको थियो । दोस्रो सेटमा २५–२२ को जित निकाल्दै खेलमा फर्किएको नेपालले तेस्रो सेट १६–२५ ले गुमाउन पुगेको थियो । प्रतिस्पर्धात्मक चौथो सेटमा १३–१३ को बराबरीको अवस्थाबाट पछि परेको नेपालले २ अंक मात्रै जोडेन सकेपछि १५–२५ ले गुमाउन पुग्यो ।

यो हारसँगै नेपालको फाइनल पुग्ने सम्भावना न्युन बनेको छ । नेपालले ३ खेल खेल्दा ३ अंक जोडेको छ । नेपाल पहिलो खेलमा बंगलादेशसँग ३–० को सोझो सेटमा पराजित हुँदा दोस्रो खेलमा साविकको उपविजेता उज्वेकिस्तानलाई ३–१ को सेटमा जित निकाल्न सफल भएको थियो ।

लिग चरणमा बंगलादेश र श्रीलंकाको दुई खेलबाट समान ६ अंक छ । नेपाल र उज्वेकिस्तानको समान तीन खेलमा ३ अंक छ । माल्दिभ्सले अंकको खाता खोल्न सकेको छैन ।

अब नेपालले लिग चरणको अन्तिम खेलमा आइतबार माल्दिभ्ससँग खेल्नेछ । सोही दिन बंगलादेश र श्रीलंकाबीच खेल हुनेछ । सोमबार श्रीलंका र माल्दिभ्स तथा बंगलादेश र उज्वेकिस्तानबीच खेल हुनेछ । मंगलबार फाइनल र तेस्रो स्थानको लागि खेल हुनेछ ।