काठमाडौं (हाम्रो खेलकुद) – बंगलादेशमा जारी एभिसी एसियन सेन्ट्रल जोन महिला तथा पुरुष भलिबल च्याम्पियनसिप अन्तरगतको पुरुषतर्फको खेलमा नेपालले श्रीलंकासँग खेल्दैछ ।

खेल ढाका मिरपुरस्थित शाहिद शुरवार्दी इन्डोर स्टेडियममा नेपाली समयअनुसार साँझ ५ः४५ बजे हुनेछ । पहिलो खेलमा घरेलु टोली बंगलादेशसँग पराजय भोगेपनि दोस्रो खेलमा साविकको विजेता उज्वेकिस्तानलाई हराएको नेपाल उच्च मनोवलका साथ कोर्टमा उत्रनेछ ।

नेपाल श्रीलंकालाई हराउँदै फाइनल पुग्ने सम्भावना बलियो बनाउन चहान्छ । उज्जेकिस्तानविरुद्धको खेलमा उच्च प्रदर्शन गरेका सेटर हरिहजुर थापा, धन बहादुर भट्ट क्षेत्री, मनाबहादुर श्रेष्ठ, हरि बहादुर अधिकारी, दर्गा बहादुर खड्का, कप्तान इम बहादुर राना, विनोद चन्द, भैरव बम, राजेन्द्र विष्ट, टेकराज अवस्थी, विशाल विक र सरन सामरी क्षेत्री रहेका छन् ।

पहिलो खेलमा आयोजक बंगलादेशसँग सोझो सेटमा हार बेहोरेको नेपाल उज्वेकिस्तानलाई ३–१ को सेटमा हराउँदै जित निकालेको थियो ।यता, श्रीलंका पनि नेपाललाई पराजित गर्ने लक्ष्यमा कोर्टमा उत्रनेछ । श्रीलंका लगातार दोस्रो जितको खोजीमा हुनेछ । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।

महिला टोलीले लगातार तेस्रो जित निकाल्दै फाइनल नजिक पुगेको छ । महिला टोलीले श्रीलंका, माल्दिभ्स र बंगलादेशलाई पराजित गरिसकेको छ ।