काठमाडौं (हाम्रो खेलकुद) – एभिसी एसियन सेन्ट्रल जोन महिला तथा पुरुष भलिबल च्याम्पियनसिपमा नेपाली महिला टोलीले अहिले आयोजक बंगलादेशसँग खेल्दैछ ।

खेल बंगलादेश ढाका मिरपुरस्थित शाहिद शुरवार्दी इन्डोर स्टेडियममा ९ः१५ बजे हुनेछ । घरेलु टोलीलाई हराउँदै नेपाली महिला टोली लगातार तेस्रो जितको खोजीमा हुनेछ ।

नेपालले पहिलो खेलमा श्रीलंकालाई ३–२ को सेटमा तथा दाोस्रो खेलमा माल्दिभ्सलाई ३–० को सोझो सेटमा पराजित गरेको थियो । नेपालको दुई खेलबाट ५ अंक छ । शीर्षस्थानको उज्वेकिस्तानको ६ अंक छ । श्रीलंकाको ४ तथा किर्गिस्तानको ३ अंक छ । बंगलादेशले अंकको खाता खोल्न सकेको छैन ।

नेपाली टोलीसँग प्रतिभा माली, सरस्वती चौधरी, कप्तान अरुणा शाही, सुनिता खड्का, उषा भण्डारी, साफिया पुन र सलिना श्रेष्ठलगायतको खेलाडीको साथ रहेको छ ।

श्रीलंकाविरुद्धको खेलबाटै राष्ट्रिय टोलीमा डेब्यु गरेका कामना विष्ट र शान्ति थारु पनि टोलीमा छन् । कृपा अधिकारी, मनिषा श्रेष्ठ र लक्ष्मी चन्द पनि टोलीमा छन् । तुलनात्मक रुपमा कमजोर बंगलादेशविरुद्ध प्रशिषक जगदिश प्रसाद भट्टले मुख्य खेलाडीलाई विश्राम दिन सक्नेछ ।

घरेलु टोली बंगलादेश नेपाललाई बलियो चुनौती पेश गर्ने लक्ष्यमा कोर्टमा उत्रनेछ । बंगलादेशको लक्ष्य नेपालविरुद्ध बढी भन्दा बढी अंक जोड्ने योजनामा हुनेछ ।

महिलातर्फ आयोजक बंगलादेश, किर्गिस्तान, माल्दिभ्स, नेपाल, श्रीलंका र उज्वेकिस्तान गरी ६ राष्ट्रको सहभागिता छ । राउन्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछन् । त्यस्तै, तेस्रो र चौथो टोलीले तेस्रो स्थानको लागि प्रतिस्पर्धा गर्नेछ । फाइनल २९ डिसेम्वरमा हुनेछ ।

पुरुषतर्फ नेपालले आज नै नेपालले श्रीलंकासँग साँझ ५ः४५ बजे खेल्दैछ । नेपाल दोस्रो जितको खोजीमा हुनेछ । पहिलो खेलमा आयोजक बंगलादेशसँग सोझो सेटमा हार बेहोरेको नेपाल उज्वेकिस्तानलाई ३–१ को सेटमा हराउँदै जित निकालेको थियो । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।