काठमाडौं (हाम्रो खेलकुद) – नेपाल टेलिकम र सिल्क ग्रुप राजधानीमा जारी कुमारी बैंक काठमाडौं टिम च्याम्पियनसिप कर्पोरेट ब्याडमिन्टन (आमन्त्रण) च्याम्पियनसिपको फाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको खेलमा नेपाल टेलिकमले नेपाल आयल निगमलाई ३–२ को सेटमा पराजित गर्दै फाइनलमा स्थान बनाउन सफल भएको हो ।

पुरुष एकलमा रत्नजित तामाङले विष्णु कटवाललाई २१–७ र २१–१० ले पराजित गर्दा महिला एकलमा निगमकी रशिला महर्जनले सीमा राजवंशीलाई २१–१२ र २१–१८ को सेटमा हराइन् । पुरुष डबल्समा टेलिकमका शोभाकर भण्डारी र सुरेन्द्र सिंह कार्कीको जोडीले लक्ष्मण र राम विश्वकर्माको जोडीलाई २१–९ र २१–८ ले पराजित गरे ।

महिला डबल्समा निगमका शर्मिला कटवाल र रशिला महर्जनको जोडीले जेटी गुड्डी कार्की र सीमा राजवंशीको जोडीलाई २१–१२, १६–२१ र २१–८ ले हराइन् । पुरुष डबल्सको अर्का खेलमा रत्नजित तामाङ र सुरेन्द सिंह कार्कीको जोडीले राम विश्वकर्मा र विष्णु कटवालको जोडीलाई २१–१८ र २१–९ ले पराजित गर्दै फाइनलमा स्थान बनाउन सफल भयो ।

अर्काे खेलमा सिल्क ग्रुपले नेपाल विद्युत प्राधिकरणलाई ३–१ को सेटमा पराजित गर्दै उपाधिनजिक पुगेको छ । पुरुष एकलमा विकास श्रेष्ठले दीपक बोहोरालाई २१–१८ र २१–१७ ले पराजित गरे । महिला एकलमा अनुमाया राईले शोभा गौचनलाई २१–१६, १८–२१ र २१–१३ ले पराजित गरिन् । पुरुष डबल्समा नेपाल विद्युत प्राधिकरणका श्री प्रसाद धिमाल र राजु महर्जनको जोडीले सुवास अधिकारी र रमेश शेर्पाको जोडीलाई २१–११ र २१–१४ पराजित गरे । महिला डबल्समा अनुमाया राई र टासी शेर्पाको जोडीले शोभा गौचन र याम कुमारी गुरुङको जोडीलाई २१–१३ र २१–१९ ले पराजित गर्न सफल भयो ।

६ देखि ९ पुससम्म हुने च्याम्पियनसिपका कुमारी बैंक, नेपाल राष्ट्र बैंक, नेपाल टेलिकम, कान्तिपुर पब्लिकेसन, नेपाल आयल निगम, आइएमई ग्रुप, सिल्क ग्रुप र नेपाल विद्युत प्राधिकरणले सहभागिता जनाएको छ । ५ इभेन्ट्समध्ये ३ इभेन्ट्स जित्ने टिम च्याम्पियन हुनेछ ।

करिब ४९ लाख ४६ हजार रुपैयाँ लाग्ने काठमाडौं टिम च्याम्पियनसिपमा विजेता टिमका वरीयता प्राप्त खेलाडीले ७५ हजार, उपविजेताले ६० हजार, तेस्रोले ५५ हजार र चौथोले ४७ हजार ५ सय रुपैयाँ पाउनेछन् ।

वरीयता प्राप्त खेलाडीलाई दर्ता हुने बित्तिकै २० हजार प्रदान गरिने र प्रत्येक खेलमा म्याच फि २ हजार ५ सय प्रदान गरिने र समूह चरणबाटै बाहिरिने खेलाडीले पनि ३५ हजारसम्म प्राप्त गर्न सक्ने आयोजकले जनाएको छ । टिम च्याम्पियनलाई आकर्षक रनिङ ट्रफी दिइनेछ । पहिलो, दोस्रो र तेस्रो हुने खेलाडीहरूले मेडल तथा गिफ्ट ह्याम्पर पाउनेछन् ।