काठमाडौं (हाम्रो खेलकुद) – स्पाइकद्धय शान्ति थारु र कामना विष्टले महिला राष्ट्रिय भलिबल टोलीमा ‘डेब्यु’ गरेका छन् । बंगलादेशमा बिहीबारदेखि शुरु भएको एभिसी एसियन सेन्ट्रल जोन महिला तथा पुरुष भलिबल च्याम्पियनसिप अन्तरगत श्रीलंकाविरुद्ध ३–२ को सेटमा जित निकालेको खेलबाट कामना र शान्तिले राष्ट्रिय टोलीमा डेब्यु गरेका हुन् ।

कामनाले सुरुवाती सेटमै तथा शान्तिले कामनाको स्थान लिँदै राष्ट्रिय टोलीमा डेब्यु गरेकी हुन् । दुवै जनाले पहिलोपटक राष्ट्रिय टोलीमा स्थान बनाउन सफल भएकी थिइन् । घरेलु भलिबलमा कामनाले विभागीय नेपाल पुलिस क्लबबाट तथा शान्तिले त्रिभुवन आर्मी क्लबबाट खेल्दै आएकी छन् ।

श्रीलंकाविरुद्धको खेलमा नेपालले सुरुवाती दुई सेट गुमाएपनि त्यसपछिको तीन सेट आफ्नो पक्षमा पार्दै पूनरागमन जितसहित विजयी सुरुवात गर्न सफल भएको थियो । नेपालले पहिलो र दोस्रो सेट क्रमश १९–२५ र २१–२५ ले गुमाएको थियो । त्यसपछिको तीनै सेट नेपालले २५–१५, २५–१९ र १५–१३ ले जित्न सफल भएको थियो ।

अब नेपाली महिला टोलीले २४ डिसेम्वरमा महिला टोलीले माल्दिभ्ससँग खेल्नेछ । २५ डिसेम्वरमा घरेलु टोली बंगलादेशसँग तथा लिगको अन्तिम खेलमा उज्वेकिस्तानसँग खेल्ने तालिका छ । लिगकम नकआउट चरणपछि शीर्ष दुई टोलीले फाइनल खेल्नेछ । तेस्रो र चौथोले २८ डिसेम्वरमा तेस्रो र चौथो स्थानको लागि खेल्नेछ । पुरुष र महिलाको फाइनल २९ डिसेम्वरमा हुनेछ ।