विशाखापट्नम (एजेन्सी)– भारतले इङ्ल्यान्डसँगको पाँच टेस्टको श्रृखंलामा १–० को अग्रता लिएको छ । दोस्रो टेस्टमा २ सय ४६ रनको जित निकाल्दै भारतले टेस्ट श्रृखंलामा अग्रता लिएको थियो । ४ सय ५ रनको लक्ष्य पछ्याएको इङ्ल्यान्ड पाँचौं तथा अन्तिम दिन १ सय ५८ रनमा अलआउट भएको थियो ।

इङ्ल्यान्डले २ विकेटको क्षेतिमा ८७ रनबाट पाँचौं दिन सोमबारको खेल अघि बढाएको थियो । थप ७१ रन जाड्दा टोलीले बाँकी ८ विकेट गुमाएको थियो । टोलीका लागि कप्तान एलेस्टर कुकुले ५४ रन बनाए । त्यसबाहेकका खेलाडीको प्रदर्शन कमजोर रह्यो । पहिलो इनिङमा ५ विकेट लिएका रविचन्द्रन आश्विनले ३ विकेट लिएका थिए । अन्य दुई स्पिनर जयन्त यादवले ३ र रविन्द्र जडेजाले २ विकेट लिएका थिए ।
कप्तान विराट कोहली र चेतेश्वर पुजाराको शतकको मद्दतमा भारतले पहिलो इनिङमा ४ सय ५५ रन बनाएको थियो । कोहलीले १ सय ६७ र पुजाराले १ सय १९ रन बनाएका थिए । जवाफमा इङ्ल्यान्डले पहिलो इनिङमा २ सय ५५ रन मात्र बनाउन सकेपछि भारतले पहिलो इनिङमै २ सय रनको अग्रता लिएको थियो । दोस्रो इनिङमा भारतले २ सय ४ रन जोडेपछि इङ्ल्यान्डले ४ सय ५ रनको लक्ष्य पाएको थियो । दोस्रो इनिङमा पनि कोहलीले अर्धशतक(८१ रन) पुरा गरेका थिए । कोहली खेलको म्यान अफ दी म्याच चुनिए । यी दुई टोलीबीचको पहिलो टेस्ट बराबरीमा टुंगिएको थियो । तस्रो टेस्ट शनिबार मोहालीमा सुरु हुनेछ ।