काठमाडौं (हाम्रो खेलकुद) – नेपाल आर्मीका दीप साउन र स्वेच्छा नेम्वाङको जोडी प्रथम नेपाल एपीएम खुला टेबलटेनिस प्रतियोगिताको मिक्स डबल्समा च्याम्पियन बनेका छन् ।

नेपाल एपीएम टेबलटेनिस प्रालिको आयोजनामा भैसेपाटीस्थित हलमा बिहीबार भएको फाइनलमा दीप र स्वेच्छाको जोडीले नेपाल प्रहरीका स्यान्टु श्रेष्ठ र मन्जु सुवालको जोडीलाई ७–११, ९–११, ११–३, १२–१० र ११–४ को प्रतिस्पर्धात्मक सेटमा पराजित गर्दै स्वर्ण जितेका हुन् ।

आर्मीका रविना महर्जन र कुशल न्याछो तथा एपीएफका अनिता महर्जन र राजिव चिकबन्जारको जोडी संयुक्त रुपमा तेस्रो भए । यु–१६ ब्वाइज सिंगल्समा न्यु होराइजनका प्रवेश बस्नेतले स्वर्ण जिते । उनले फाइनलमा केज एकेडेमीका विशाल गोललाई ३–२ को सेटमा हराए ।

गार्गी एकेडेमीका प्रिन्स थापा र एनिस पिङपोङ क्लबका अद्रियन शाही तेश्रो भए । सोही स्पर्धाको गल्र्समा आर्मीकी दिया देउला च्याम्पियन बनिन् । फाइनलमा दियाले आर्मीकै सुस्मिता खड्कालाई ३–१ को सेटमा पाखा लगाइन् । एपीएम क्लबकाद्वय योङगी पौडेल र अनामिका कस्ती संयुक्त रुपमा तेश्रो भए ।

प्रतियोगिताको सह–प्रायोजक पूर्णशंकर श्रेष्ठले एक कार्यक्रबीच उद्घाटन गरे । ८ स्पर्धा समावेश प्रतियोगितामा ३ सय ५० खेलाडी सहभागी छन् । सबै स्पर्धाका पदक विजेतालाई सिओम टेबलटेनिस नेपालद्वारा प्रायोजित ५ लाख रुपैयाँ बराबरको टेबलटेनिस खेल सामाग्री पुरस्कार स्वरुप पाउने छन् ।

पुरुष-महिला सिंगल्समा भने नगद पुरस्कार पनि राखिएको छ । प्रतियोगिता शनिबार सम्पन्न हुने छ ।