काठमाडौं (हाम्रो खेलकुद) – नेपाली ब्याडमिन्टनमा युवा स्टार प्रिन्स दाहाल र रसिला महर्जन एसिया ओलम्पिक प्रोजेक्ट (एओपी) मा नेपालबाट छनोट भएका छन् ।

नेपाल ब्याडमिनटन संघको पहलमा उनीहरुले यो अवसर प्राप्त गरेका हुन् । यो फ्रान्सको पेरिसमा हुने पेरिस ओलम्पिक २०२४ को परियोजना समेत हो । एसिया ओलम्पिक प्रोजेक्ट ब्याडमिन्टन एसियाको खेलाडीको स्तरवृद्धिको लागि पहल हो । एओपीले ब्याडमिन्टन एसिया प्रोजेक्ट (२०२०–२४) अनुसार ब्याडमिन्टन एसियाले विकासोन्मुख देशका खेलाडीहरुका लागि प्रशिक्षण अवसर र छात्रवृत्ति पाउनेछन् ।

जसमा नेपाल ब्याडमिन्टन संघको पहलमा प्रिन्स र रशिलाले यो अवसर प्राप्त गरेको हो । उनीहरुको प्रशिक्षणसँगै विभिन्न प्रतियोगिताका लागि ब्याडमिन्टन एसियाबाट वार्षिक ३ हजार अमेरिकी डलर प्रदान गर्ने र त्यसलाई व्यवास्थापन गर्नुपर्ने ब्याडमिन्टन संघका अध्यक्ष रामजीबहादुर श्रेष्ठले बताए ।

उनीहरुले यही राष्ट्र वा स्थानमा प्रशिक्षण गर्नुपर्ने भन्ने उल्लेख नरहेको र सामान्यतय मलेसियामा नै प्रशिक्षण र प्रतियोगिता खेल्ने सम्भावना रहेको अध्यक्ष श्रेष्ठले जानकारी गराए । यो प्रोजेक्टबाट उनीहरुले तीन वर्षको अवधिमा प्रशिक्षणसँगै विभिन्न प्रतियोगिता खेल्दै आफ्नो वरीयता सुधार गर्ने अवसर पाउनेछन् ।

यसअघि नेपालको शीर्ष वरीयताका रत्नजित तामाङ र दिपेश धामीले पनि यो अवसर प्राप्त गरेका थिए । प्रिन्स विश्व जुनियरको वरीयतामा तेस्रो स्थानमा रहेका छन् । उनले पछिल्लो समय लगतार उच्च प्रदर्शन गरिरहेका छन् । रशिलाले पनि पछिल्लो समय घरेलु ब्याडमिन्टनमा लगातार उच्च प्रदर्शन गरिरहेकी छिन् । रशिला जुनियर वरीयतामा ६८औं स्थानमा रहेकी छिन् ।