एजेन्सी – ओपनर मोहम्मद रिजवान र हैदर अलीको उत्कृष्ट अर्धशतकको सहयोगमा पाकिस्तानले पहिलो टि२० आई खेलमा वेस्टइन्डिजमाथि ६३ रनको सानदार जित हात पारेको छ । योसँगै तीन टि२० आई सिरिजमा घरेलु टोली पाकिस्तानले १–० को अग्रता लिएको छ ।

२ सय १ रनको विजयी लक्ष्य पछ्याएको वेस्टइन्डिज १९ ओभरमा १ सय ३७ रनमा अल आउट भयो । वेस्टइन्डिजका ओपनर शाई होपले २६ बलमा ४ चौकासहित सर्वाधिक ३१ रन बनाए । ओडियन स्मिथले १६ बलमा २ चौका र २ छक्कासहित सर्वाधिक २४ रन बनाए । निकोलस पुरन १० बलमा १ चौका र २ छक्का प्रहार गर्दै १८ रनमा आउट भए । रोभमन पावेल २३ र रोमारियो शेफर्डले २१ रन बनाए ।

पाकिस्तानका तीव्र गतिका बलर मोहम्मद वासिम जुनियरले ४ ओभरमा ४० रन खर्चेर ४ विकेट लिए । शादब खानले ४ ओभरमा १ मेडन सहित १७ रन खर्चेर ३ विकेट लिए । शाहिन अफ्रिदी, मोहम्मद नवाज र हरिस रौफले १-१ विकेट लिए । त्यसअघि नेशनल स्टेडियम कराँचीमा टस हारेर पहिला ब्याटिङ थालेको पाकिस्तानले निर्धारित २० ओभरमा ६ विकेट गुमाउँदै २ सय रन बनाएको थियो । मोहम्मद रिजवानले ५२ बलमा १० चौका प्रहार गर्दै सर्वाधिक ७८ रन बनाए ।

युवा ब्याटर हैदर अलीले ३९ बलमा ६ चौका र ४ छक्कासहित ६८ रनको उत्कृष्ट इनिङ खेले । कप्तान बाबर आजम शून्यमा आउट भएपनि तेस्रो विकेटका लागि रिजवान र हैदर अलीले १ सय ५ रनको शतकीय साझेदारी गर्दै विशाल योगफलमा पुर्याएका थिए । मोहम्मद नवाज १० बलमा ३ चौका र २ छक्कासहित ३० रनमा अविजित रहे ।

वेस्टइन्डिजका तीव्र गतिका बलर रोमारियो शेफर्डले सर्वाधिक २ विकेट लिए । ओडियन स्मिथ, डोमिनिक ड्रेक्स, ओशान थोमस र अकिल हुसैनले १–१ विकेट लिए । दोस्रो खेल मंगलबार हुनेछ ।