काठमाडौं (हाम्रो खेलकुद) – घरेलु भलिबलको चर्चित न्यु डायमन्ड स्पोर्ट्स क्लबको आफ्नै इन्डोर हल निर्माण गर्ने भएको छ । क्लबले शुक्रबार चन्द्रागिरी नगरपालिका १३ पुरानो नैकापमा इन्डोर हल बन्ने जग्गामा भुमि पुजा गर्दै इन्डोर हल निर्माणको कार्य सुरुवात गरेको छ ।

क्लबले दुई रोपनी ८ आना दुई पैसा जग्गा १० वर्षको लागि भाडामा हल निर्माण गर्न लागेको हो । सोही जग्गामा क्लबले १२ महिनै प्रशिक्षण गर्न मिल्ने भलिबल कोर्ट, जिम हल, क्यान्टिन, चेन्जिङ रुम, ट्वाइलेट, वाथ रुम र आवास निर्माण गर्ने क्लबका प्रशिक्षक कुमार राईले जानकारी गराए । शिलन्यास केही दिनमा हुने र डिपिआरको दुई मोडल तयार भइरहेको र प्रारम्भिक चरणमा कार्य सुरु गरिने क्लबका अध्यक्ष सुनकेशरी मालीले बताइन् ।

‘दुई मोडलमध्ये प्याराफिटसहितको इन्डोर हलको लागत ३ करोड, प्याराफिटरहितको हलको लागत २ करोड रुपैयाँ भन्दा माथि लागत लाग्ने अनुमान छ ’ अध्यक्ष मालीले भनिन्, ‘अब मुख्य कुरा आर्थिक पाटो नै हो । नेपाल सरकार, प्रदेश सरकार, स्थानिय सरकार, निजी संघ सस्था र शुभेच्छुकहरुबाट आर्थिक सहयोग पाएको खण्डमा आउदो जेठ ८ (भलिबल दिवस) मा यही इन्डोर हलमा भलिबल दिवस मनाउने लक्ष्य छ ।’

प्रशिक्षक राईले अहिलेको मुख्य प्राथमिकता भने भलिबल कोर्ट, चेन्जिङ रुम, ट्वाइलेट र बाथ रुम नै रहेको बताए । उनले भलिबल खेल्ने खेलाडीलाई पनि यही राख्ने र ४० जनासम्मलाई त्यही आवासमा राखिने योजना रहेको सुनाए । यसमा विशेष गरी महिला नै हुन्छ । उनले स्पोर्ट्स क्लबलाई नेपालको नमुना ट्रेनिङ सेन्टर बनाउने लक्ष्य रहेको योजना सुनाए ।

क्लबले २०६४ जेठ ५ गतेदेखि एकेडेमीकै धुले कोर्टमा नियमित प्रशिक्षण गर्दै आइरहेको छ । सोही कोर्टबाट उत्पादित खेलाडीले राष्ट्रिय टोलीको ढोका खोल्दै आफ्नो प्रतिभा देखाइसकेका छन् । रमिला तण्डुकार, रेश्मा भण्डारी, प्रतिभा माली, कृपा अधिकारी र सलिना श्रेष्ठ सोही एकेडेमीबाट उत्पादिन खेलाडी हुन् ।