काठमाडौं (हाम्रो खेलकुद)- एथलेटिक्स परिवार नेपालले आयोजना गरेको युथ एथलेटिक्स च्याम्पियनसिपको पहिलो दिन सोमबार ४ सय मिटर ब्वाइजमा बंगलादेशका जेल्दा सर्जिल हसन खानले ५१.६ सेकेन्डमा दुरी पार गर्दै स्वर्ण जितका छन् । बंगलादेशकै मिहिबुल्लाह मोहम्मद खालिदले ५१.८ सेकेन्डमा दुरी पार गर्दै रजत पदक प्राप्त गर्दा नेपालका नारायण चौधरीले ५२.४२ सेकेन्डमा दुरी पार गर्दै कास्य पदक जिते ।

दशरथ रंगशालामा भएको च्याम्पियनसिपको ४ सय मिटर गल्समा बंगलादेशकी रुना नुरसाद जहानले १ मिनेट ०.४ सेकेन्डमा दुरी पार गर्दै स्वर्ण जितिन् । दाङकी अरुणा रिजालले १ मिनेट ०२. २ सेकेन्डमा दुरी पार गर्दै रजत पदक प्राप्त गरिन् । त्यस्तै वीरगन्जकी संगिता कुमारी यादवले १ मिनेट ०५.२ सेकेन्डमा दुरी पार गर्दै कास्य पदक जित्न सफल भइन् ।

यु–२० लङजम्प ब्वाइजमा बर्दियाका राम लाख थारुले ६.३३ मिटर दुरी जम्प गर्दै स्वर्ण पदक जिते । नवलपरासीका सलिम देवानले पनि ६.३३ मिटर दुरी जम्प गरेपनि उनी प्राविधिक फल्टमा रजत पदकमा सिमित भए । बर्दियाकै रोशन थारुले ५.९७ मिटर जम्प गर्दै कास्य पदक जिते । गल्स यु २० लङजम्पमा बंगलादेशकी सोयिा अख्तरले ५.७७ मिटर जम्प गर्दै स्वर्ण पदक जितिन् । दाङकी सीमा चौधरीले ४.६४ मिटर जम्प गर्दै रजत पदक तथा बर्दियाकी रविना थारुले ४.२४ मिटर जम्प गर्दै कास्य पदक जितिन् ।

यु–१६ लङजम्प ब्वाइजमा कपिलवस्तुका सुदिप थारुले ६.६८ मिटर जम्प गर्दै पहिलो स्थान हासिल गरे । कपिलवस्तुकै रामजित विश्वकर्मा ५.७७ मिटर जम्प गर्दै दोस्रो तथा चितवनका सुदिप महतोले ५.६३ मिटर जम्प गर्दै तेस्रो स्थान प्राप्त गरे । यु १६ गल्स लङजम्पमा दाङकी करुणा रिजालले ४.२७ मिटर जम्प गर्दै पहिलो भइन् । दाङकै सुशिला चौधरी ४.२० मिटर जम्प गर्दै दोस्रो तथा नुवाकोटकी धनु राई ४.०५ मिटर जम्प गर्दै तेस्रो भइन् ।

यु–१६ सटपुट ब्वाइजमा चितवन दिपेश महतोले १३.४० मिटर थ्रोका साथ पहिलो भए । कपिलवस्तुका तुलसीराम थारु १२.५४ मिटर थ्रो गर्दै दोस्रो तथा वीरगन्जका आदेश कुमार यादव १०.२१ मिटर थ्रो गर्दै तेस्रो भए । यु–२० सटपुट गल्समा दाङकी सुशिला चौधरीले ९.८२ मिटर थ्रुका साथ स्वर्ण जितिन् । विजेश्वरीकी निशा भुजेलले ७.७० मिटर थ्रोका साथ रजत तथा झापाकी कञ्चन विमली ७.५३ मिटर थ्रुका साथ कास्य पदक जितिन् ।

यु–१६ ब्वाइज ४ सय मिटर रिलेमा वीरगन्जका आदेश यादव, पुष्पराज यादव, आलेक गुप्ता र शत्रिधन पटेलको समूह पहिलो भयो । प्रेम बहादुर थापा, पाल्देन गुरुङ, दीपक घले र सुमन ट्याङले समूह दोस्रो तथा कपिलवस्तुका शंकर चौधरी, प्रेम थारु, गोविन्द थारु र रामजी विकेको समूह तेस्रो भयो ।

गल्समा लक्ष्मी शाही, मालता शाही, भावना पर्सल र रमिला शाहीको समूह पहिलो भयो । विजेश्वरीका सुनिदा कार्की, आयुष्मा आचार्य, एस्विना खत्री र भगवती बलामी मगरको समूह दोस्रो तथा दाङको करुणा रिजाल, रितिका बोहोरा, सुशिला चौधरी र मनिषा श्रेष्ठको समूहले तेस्रो स्थान हात पारेको छ ।

दुई दिन युथ एथलेटिक्स च्याम्पियनसिपको दोस्रो दिन मंगलबार विभिन्न स्पर्धामा स्वर्णका लासग प्रतिस्पर्धा हुने आयोजक एथलेटिक्स परिवार नेपालका अध्यक्ष राजन खत्रीले जानकारी गराए । उनका अनुसार च्याम्पियनसिपमा बंगलादेशका ८ जनासहित ४५ भन्दा बढी जिल्लाबाट ४ सय बढीले च्याम्पियनसिपमा प्रतिस्पर्धा गरिरहेका छन् ।