काठमाडौं (हाम्रो खेलकुद) – आयोजक गुरुङ स्पोर्ट्स हाउसलाई पराजित गर्दै ढोरपाटन भलिबल प्रशिक्षण केन्द्रले प्रथम गुरुङ स्पोर्ट्स हाउस कप राष्ट्रिय खुला भेट्रान्स पुरुष भलिबल प्रतियोगिताको उपाधि जितेको छ ।

ढोरपाटन भलिबल प्रशिक्षण केन्द्र नयाँबसपार्कमा शनिबार भएको फाइनलमा आयोजक गुरुङ स्पोर्ट्स हाउसलाई ३–० को सेटमा पराजित गर्दै उपाधि हात पारेको हो । पहिलो सेटमा २५–१६ को जित निकालेको ढोरपाटनले दोस्रो सेट २५–२१ ले तथा तेस्रो सेटमा २५–२० को सहज जित निकाल्यो ।

यसैगरी, मण्डली स्पोर्ट्स क्लब पाल्पाले प्रदेश १ को रातो टोलीलाई २२–२५, २५–१८, २५–१९, २३–२५ र १५–१० ले हराउदै तेस्रो स्थान हात पारेको छ । उपाधिसँगै ढोरपाटनले १ लाख ११ हजार १ सय ११ रुपैया तथा उपविजयी गुरुङ स्पोर्ट्स हाउसले ६१ हजार १ सय ११ रुपैया पुरस्कार प्राप्त गरेको छ । तेस्रो भएको मन्डलीले ३१ हजार १ सय ११ रुपैया तथा चौथो भएको प्रदेश १ रातोले ११ हजार १ सय ११ रुपैया हात पारेको छ ।

प्रतियोगितामा ढोरपाटनका प्रताप खवास उत्कृष्ट खेलाडी घोषित भए । यसैगरी, गुरुङ स्पोर्ट्स हाउसका सन्तोष श्रेष्ठ उत्कृष्ट स्पाइकर, प्रदेश १ का राम घताने उत्कृष्ट ब्लकर र ढोरपाटनका मनबीर छन्त्याल उत्कृष्ट डिफेन्स घोषित भए । मण्डलीका राजन गुरुङ उत्कृष्ट सर्भर तथा ढोरपाटनका मन कुमार छन्त्याल उत्कृष्ट प्रशिक्षक घोषित भए । उत्कृष्ट खेलाडीले ५ हजार तथा अन्य विधागत उत्कृष्टले ३ हजार रुपैया पुरस्कार पाए ।

विजेता टोली तथा खेलाडीलाई राखेप सदस्य एकेन्द्र कुवँर र नेपाल भलिबल संघका कार्यबाहक अध्यक्ष याम बहादुर गुरुङ लगायत, स्पोर्ट्स हाउसका अध्यक्ष नवीन गुरुङलगायतले पुरस्कृत गरे ।

लिगकम नकआउटको आधारमा गत मंगलबारदेखि भएको प्रतियोगितामा १६ टोलीको सहभागिता रहेको थियो । सहभागी टोलीलाई चार समूहमा विभाजन गरिएको थियो । हरेक समूहका शीर्ष दुई टोलीले क्वाटरफाइनलमा स्थान बनाएका थिए । एक टोलीमा पाँच खेलाडी रहँदा कोर्टमा चार खेलाडी हुनुपर्ने प्रावधान रहेको थियो ।