सिन्धुपाल्चोक (हाम्रो खेलकुद) – विभागीय त्रिभुवन आर्मी क्लबका रत्नजित तामाङ र रशिला महर्जनले सिन्धुपाल्चोकमा सम्पन्न बाह्रबिसे कप खुल्ला राष्ट्रब्यापी ब्याडमिन्टन प्रतियोगिताको उपाधि जितेको छ । रत्नजित पुरुष एकलमा तथा रशिला महिला एकलमा च्याम्पियन बनेको हो ।

सेनाको बर्चस्व रहेको प्रतियोगितामा रत्नले सेनाकै नविन श्रेष्ठमाथि २१–१८ र २१–१९ को जित निकाल्दै उपाधि उचालेका हुन । रत्नले उपाधिसँगै १ लाख २५ हजारसहित मेडल र प्रमाण पत्र प्राप्त गरे । दोस्रो भएका नविनले ६५ हजारसहित मेडल र प्रमाण पत्र प्राप्त गरे ।

गत बुधबारदेखि सुरु भएको प्रतियोगिताको महिला एकलतर्फ सेनाकी रशिला महर्जनले सेनाकै अमिता गिरीमाथि २–० को सोझो सेटमा जित निकाल्दै उपाधि जित्न सफल भयो । उपाधी हात पार्ने क्रममा रशिलाले गिरीमाथि २१–१६ र २१–१६ को समान अन्तरले पराजित गरिन् । रशिलाले नगद ५० हजारसहित मेडल र प्रमाण पत्र तथा गिरीले २५ हजार सहित मेडल र प्रमाण पत्र प्राप्त गरे । तृतीय स्थान प्राप्त गर्ने निता र अनुमाया प्रत्येकले नगद १२ हजार ५ सयका साथ मेडल र प्रमाण पत्र प्राप्त गरे ।

उच्च २० बरियतादेखि बाहेकका पुरुष युगल तर्फको खेलमा कास्कीका बिधान अधिकारी र बिशाल खड्काले उपाधी जिते । अधिकारी र खड्काको जोडीले सेनाका पविन लिनथेप र सुरोज महर्जनको जोडीलाई २१–१६, २१–१७ ले पराजित गर्दै उपाधी उचालेका हुन् । पुरुष युगल तर्फ बिजयी र उपबिजयी खेलाडीहरुले नगद १ लाख र ५० हजारका साथै मेडल र प्रमाण पत्र प्राप्त गरे ।

भेट्रान्स ४५ बर्ष माथिको प्रतिस्पर्धामा पर्फेक्ट फिटनेश क्लबका संजय कपाली र श्याम लामाको जोडीले तनहुका मान बहादुर राना मगर र देव बहादुर थापाको जोडीलाई २१–१८, २१–११ ले पराजित गरे । बिजेता तथा उपबिजेताले गिफ्ट ह्याम्परका साथै मेडल र प्रमाण पत्र प्राप्त गरे ।

जिल्लास्तरिय पुरुष युगल तर्फको प्रतिस्पर्धामा बाह्रबिसेका अभिषेक गुरुङ्ग र रमेश शेर्पाको जोडीले बाजी मारे । उक्त जोडीले चौताराका प्रकाश श्रेष्ठ र रमेश श्रेष्ठको जोडीलाई २१–१२, १८–२१, २१–१६ ले पराजित गरेका हुन् । जिल्लाको विजेता जोडीले ३०, दोस्रोले २० र सेमिफाइनल पुग्ने दुई जोडीले समान १० हजार रुपैयाँ प्राप्त गरे ।

यस अघि आजै भएको सेमिफाईनलमा सेनाका रत्नजितले सेनाकै प्रफुल महर्जनलाई तथा नविनले बरियतामा दोश्रो स्थानमा रहेका एपिएफका दिपेश धामीलाई २–१ को सेटमा जित निकाल्दै फाइनलको यात्रा तय गरेका थिए । तृतीय स्थान प्राप्त गरेका प्रफुल महर्जन र दिपेश धामी प्रत्येकले नगद ३० हजार, मेडल र प्रमाण पत्र प्राप्त गरे ।

सिल्क ग्रुपको प्रायोजन, बाह्रबिसे नगरपालिकाको सहयोग तथा खुर्सानीबारी खेलकुद कभर्डहलको आयोजनामा भएको प्रतियोगिताको पुरुष युगल तर्फ सेनाका पविन लिनथेप र सुरोज महर्जनको जोडीले बुटवलका सुशिल गिरी र बिवेक न्यौपानको जोडीलाई २१–१० र २१–१५ ले पराजित गर्दै फाईनल यात्रा तय गरेका थिए ।

बिजयी खेलाडीहरुलाई बाह्रबिसे नगरपालिकाका मेयर निमाफुञ्जी शेर्पा, उपमेयर सुशिला पाख्रिन, नेपाल ब्याडमिन्टन संघका अध्यक्ष रामजी बहादुर श्रेष्ठ लगायतले पुरस्कार वितरण गरेका थिए । प्रतियोगितामा पुरस्कार राशी ६ लाख २० हजार रुपैयाँ रहेको थियो ।