सिन्धुपाल्चोक (हाम्रो खेलुकद) – विभागीय नेपाली सेनाका रत्नजित तामाङ, नविन श्रेष्ठ र प्रफुल महर्जन तथा एपिएफका दिपेश धामी सिन्धुपाल्चोकमा जारी बाह्रबिसे कप खुल्ला राष्ट्रब्यापी ब्याडमिन्टन प्रतियोगिताको पुरुष एकलतर्फको सेमिफाईनलमा प्रवेश गरेका छन् ।

शुक्रबार भएको क्वाटरफाइनलमा शीर्ष वरीयताका रत्नजितले नेपाल पुलिसका दीपक बोहरालाई २१–६ र २१–१० को सोझो सेटमा पराजित गर्दै सेमिफाइनलमा प्रफुल महर्जनसँगको भेट पक्का गरे । महर्जनले एपिएफका साजन कृष्ण ताम्राकारलाई २१–१७ र २१–१४ को सेटमा पराजित गर्दै अन्तिम चारमा स्थान पक्का गरेका थिए ।

अर्को खेलमा सेनाका नविन श्रेष्ठले सेनाकै रुकेश महर्जन माथि २१–१२ र २१–१५ को जित निकाले । नविनले अव फाइनल प्रवेशका लाग एपिएफका दिपेश धामीसँग खेल्नेछ । धामीले पुलिसका बिष्णु कटुवाललाई २१–१० र २१–१४ ले पराजित गर्दै सेमिफाईनल प्रवेश गरेका हुन् ।

महिला एकलतर्फ सेनाकी अमिता गिरीले सेनाकै रोज पाण्डेलाई २१–१४ र २१–१० ले पराजित गर्दै सेमिफाईनल प्रवेश गरिन् । अव अमिताले फाईनल प्रवेशका लागि पुलिसकी निता लम्सालको सामना गर्नेछिन् । लम्सालले एपिएफकी शोभा गौचनलाई २१–७ र २१–१२ ले पराजित गरिन् ।

अर्को खेलमा सेनाकी रशिला महर्जनले एपिएफकी सुनैना मुखियालाई २१–९ र २१–१० ले पराजित गर्दै सेमिफाईनलमा सेनाकै अनुमाया राईसँगको भेट पक्का गरिन् । राईले सेनाकै प्रेक्षा राईलाई २१–११ र २१–१३ ले पराजित गर्दै सेमिफाईन पुगेकी हुन् ।

सिल्क ग्रुपको प्रायोजन, बाह्रबिसे नगरपालिकाको सहयोग तथा खुर्सानीबारी खेलकुद कभर्डहलको आयोजनामा भएको प्रतियोगिताको पुरुष युगलतर्फ सेनाका सुरोज महर्जन र पविन लिनथेपको जोडीले अन्तिम चारमा स्थान बनाएका छन् ।

यस्तै बुटवलका सुशिल गिरी र बिवेक न्यौपानेको जोडी, कास्कीका विधान अधिकारी र विशाल खड्काको जोडी र बालकुमारी रिमिक्सका ससिन डंगोल र सुमित महर्जनको जोडीले अन्तिम चारमा स्थन पक्का गरेका छन् ।

५ लाख ५० हजार पुरस्कार रासी रहेको प्रतियोगितामा शिर्ष तीनस्थान हात पार्ने खेलाडीहरुले पुरुष एकलतर्फ १ लाख २५ हजार, ६५ हजार र ३० हजारका साथै मेडल, प्रमाण पत्र, महिला एकलतर्फ ५० हजार, २५ हजार र १२ हजार ५ सयका साथै मेडल र प्रमाण पत्र, पुरुष युगलतर्फ १ लाख, ५० हजार र २५ हजारका साथै मेडल र प्रमाण पत्र, जिल्लास्तरिय युगलतर्फ र भेट्रान्स युगलतर्फका खेलाडीहरुले गिफ्ट ह्याम्परका साथै मेडल र प्रमाण पत्र प्राप्त गर्नेछन् ।